टिळेकरवाडीत बिबट्याचा शिरकाव! दोन शेळ्यांचा फडशा..!!
उरुळी कांचन : टिळेकरवाडी (ता. हवेली) ग्रामपंचायत हद्दीतील राउतवस्ती परिसरात बिबट्याने दोन बकऱ्यांवर हल्ला करून ठार केल्याची धक्कादायक घटना समोर आली आहे. या घटनेमुळे नागरिकांमध्ये भीतीचे वातावरण आहे. हि घटना शनिवारी (ता.२४) साडेआठ वाजण्याच्या सुमारास घडली आहे.
या हल्ल्यात अमोल दत्तोबा राऊत यांचे ६ हजार रुपयाचे तर बाळासाहेब रूपनर यांचे १० हजार रुपयांचे असे एकूण १६ हजार रुपयाचे नुकसान झाले आहे. यांच्या बकऱ्यावर बिबट्याने हल्ला केला आहे.
मिळालेल्या माहितीनुसार, शनिवारी रात्री १० वाजण्याच्या सुमारास बिबट्या पुन्हा आढळल्याने नागरिकांनी फटाके उडवून बिबट्याला त्या ठिकाणावरून पळवून लावले. नागरिकांनी हि सगळी माहिती वनअधिकाऱ्यांना दिली. वनाधिकाऱ्यांनी सक्षम नागरिकांसह रविवारी सकाळी शेत शिवारात बिबट्यांचा ठशांची पाहणी करून पंचनामा केला आहे.
दरम्यान, शिवारात बिबट्याचे अस्तित्व आढळून आल्याने नागरिकांमध्ये भीतीचे वातावरण निर्माण झाले आहे. शेतात मजूर कामास येण्यास टाळत आहे. टिळेकरवाडी परिसरात बिबट्या दिसल्याने नागरिकांनी वनविभागाला पिंजरा लावून जेरबंद करण्याची मागणी केली आहे.
