जुन्या भांडणाचा राग मनात धरून कोयत्याने वार, लोहगाव येथील घटनेने खळबळ..
पुणे : दिवसागणिक पुण्यातली गुन्हेगारी वाढते आहे असं म्हटलं तरी हरकत नाही. कोयता घेऊन रस्त्याने फिरणे, टोळा धाडी, गाड्या जाळणे एवढंच नाही तर शुल्लक रकमेसाठी हात तोडण्यासारख्या अंगावर काटा आणणारे प्रकार सध्या पुण्यात वेगात वाढले आहेत.
सध्या अशीच एक धक्कादायक घटना समोर आली आहे. लोहगाव परिसरात जुन्या भांडणाच्या वादातून एकाने मध्यस्थी करण्यास नकार दिल्याचा राग धरून टोळक्याने कोयत्याने हल्ला करत जीवे ठार मारण्याचा प्रयत्न केल्याची घटना उघडकीस आली आहे. लोहगाव येथील एम डी मोझे पेटोल पंप येथे १३ ऑगस्ट रोजी रात्री साडेअकरा वाजता हा प्रकार घडला होता.
याबाबत भाऊसाहेब गोपीनाथ राखपसरे (वय ४८, रा. मोझे आळी, चिरके कॉलनी, राखपसरे वस्ती, लोहगाव) यांनी विमानतळ पोलीस ठाण्यात फिर्याद दिली आहे. त्यावरुन पोलिसांनी नितीन सकट, निकेश पाटील, गणेश सखाराम राखपसरे, ओंकार खांडे (खंड्या) व इतर २ साथीदारांवर खुनाचा प्रयत्न केल्याचा गुन्हा दाखल केला आहे. या घटनेत भाऊसाहेब राखपसरे हे गंभीर जखमी झाले आहेत.
पोलिसांनी दिलेल्या माहितीनुसार, फिर्यादीचा चुलत भाऊ व गणेश राखपसरे यांच्यात भांडणे झाली होती. त्यात गुन्हा दाखल झाला होता. ती केस आता कोर्टात सुनावणीला आली होती. तेव्हा गणेश राखपसरे याने फिर्यादी भाऊसाहेब राखपसरे यांची सायंकाळी भेट घेऊन ती केस मागे घेण्यास सांगा, असे बोलला. त्यावर भाऊसाहेब राखपसरे यांनी तुमचे तुम्ही पहा मला काही सांगू नका, असे म्हणून मध्यस्थी करण्यास नकार दिला.
त्यानंतर रात्री फिर्यादी हे मोझे पेट्रोल पंप येथे खुर्चीवर बसले असताना त्यांच्या चुलत भावाच्या जुन्या भांडणाचा राग मनात धरुन तसेच एम पी डी ए तुझ्यामुळेच लागली, या समजातून नितीन सकट व ओंकार खांडे, निकेश पाटील व गणेश राखपसरे तसेच त्यांचे दोन साथीदार मोटारसायकलवरुन आले.
सापडला, सापडला याला आज संपवूनच टाकू असे बोलून फिर्यादी बसलेल्या प्लॉस्टिकच्या खुर्चीला लाथ मारुन त्यांना खाली पाडले. याला आज सोडायचेच नाही, असे म्हणून हातातील कोयत्याने त्यांच्या हातावर, डोक्याला गंभीर दुखापत केली.
ते पडलेले पाहून निकेश पाटील याने नितीन सकट याच्याकडे पाहून अप्पा, अप्पा कार्यक्रम झाला असे म्हणून सर्व जण पळून गेले. त्यानंतर लोकांनी भाऊसाहेब राखपसरे यांना तातडीने रुग्णालयात दाखल केले. त्यांच्या हातावर गुरुवारी शस्त्रक्रिया करण्यात आली. सहायक पोलीस निरीक्षक सचिन धामणे तपास करीत आहेत.
