कोकाटे साहेब कर्जमाफीचा पैसा बँकांना जमा होतो शेतकऱ्यांना मिळत नाही, रोज कोट बदलणाऱ्या कृषिमंत्र्यांना शेतकऱ्याचा फाटलेला सदरा दिसत नाही..
मुंबई : नाशिकमध्ये अवकाळी पावसामुळे झालेल्या नुकसानीची पाहणी करण्यासाठी कृषिमंत्री माणिकराव कोकाटे गेले होते. यावेळी एका शेतकऱ्याने त्यांना कर्जमाफीबाबत थेट प्रश्न विचारला. अजित पवार म्हणाले की कर्जमाफी होणार नाही, मग रेग्युलर कर्ज भरणाऱ्यांना कर्जमाफी मिळेल का?” या प्रश्नावर कोकाटे यांनी उत्तर देताना ते शेतकऱ्यांवर चिडले.
जे कर्ज वेळेवर फेडतात त्यांनी फेडावं. पण अनेक जण पाच-दहा वर्ष फक्त कर्जमाफीची वाट बघतात. कर्ज घेतात आणि काही भरत नाहीत. आणि जेव्हा कर्जमाफी होते, तेव्हा विचार करा, त्या पैशांचा उपयोग शेतीसाठी होतो का? एक रुपयाचीही गुंतवणूक शेतीत करता का?” असा थेट सवाल त्यांनी शेतकऱ्याला केला.
तुम्ही पीक विमा मागता, पण त्या पैशांतून साखरपुडे करता, लग्न करता, असेही ते म्हणाले, यावर शरद पवार गटाचे आमदार रोहित पवार म्हणाले, कोकाटे साहेब, कर्जमाफीचा पैसा बँकांना जमा होतो शेतकऱ्यांना मिळत नाही हे कदाचित आपल्याला ज्ञात नसावे. कर्जमाफीचा पैसा साखरपुडा, लग्नकार्यात खर्च करणे हे कमी उत्पन्न दाखवून सदनिका लाटण्याएवढे सोपे नाही.
मुळात सदनिका प्रकरणात बुडाखाली अंधार असताना शेतकऱ्यांना ब्रम्हज्ञान देण्याची गरजंच नाही. रोज कोट बदलणाऱ्या कृषिमंत्र्यांना शेतकऱ्याचा फाटलेला सदरा दिसत नसला तरी आपल्या वादग्रस्त संवेदनांचं प्रदर्शन करून शेतकऱ्यांच्या जखमांवर मीठ चोळण्यापेक्षा अवकाळीग्रस्त शेतकऱ्यांना काय मदत देता येईल यावर लक्ष केंद्रित केलं तर अधिक बरं होईल.
राजकीयदृष्ट्या थोडक्यात वाचला आहात त्यामुळे जरा जपून. अशी पोस्ट रोहित पवार यांनी केली आहे. यामुळे वातावरण तापले आहे. कृषिमंत्री माणिकराव कोकाटे हे गेल्या अनेक दिवसांपासून वादात सापडत आहेत. अशातच त्यांनी शेतकऱ्यांबाबत वादग्रस्त वक्तव्य केल्याने त्यांच्या अडचणीत वाढ झाली आहे.
