कारचालक अल्पवयीनच; पोर्श कार अपघात प्रकरणात बाल न्याय मंडळाचा पुणे पोलिसांना मोठा धक्का, ‘ती’ मागणी फेटाळली…
पुणे : कल्याणीनगरमधील दोन संगणक अभियंत्यांच्या मृत्यूला कारणीभूत ठरलेल्या पोर्श कार अपघातप्रकरणी अल्पवयीन चालकावर प्रौढांप्रमाणे खटला चालवावा, यासाठी पुणे पोलिसांनी केलेला अर्ज बाल न्याय मंडळाने अखेर फेटाळला आहे.
त्यामुळे आता या १७ वर्षीय मुलावर बाल न्याय कायद्याअंतर्गत बाल न्याय मंडळापुढेच खटला चालवला जाणार आहे. १९ मे २०२४ रोजी रात्री अडीचच्या सुमारास कल्याणीनगर येथे ही दुर्घटना घडली होती. महागड्या पोर्श कारने दोन दुचाकीस्वार संगणक अभियंत्यांना जबर धडक दिली. या अपघातात दोघांचा जागीच मृत्यू झाला.
पोलिस तपासात असे निष्पन्न झाले की अपघातावेळी वाहन चालवत असलेला आरोपी फक्त १७ वर्षांचा होता आणि त्याने त्याआधी पबमध्ये मद्यपान केले होते. त्यामुळे या आरोपीला प्रौढ घोषित करून त्याच्याविरोधात भारतीय दंड संहितेनुसार खटला चालविण्यासाठी पुणे पोलिसांनी बाल न्याय मंडळाकडे अर्ज केला होता.
विशेष सरकारी वकील शिशिर हिरे यांच्या माध्यमातून बाल न्याय मंडळाकडे अर्ज केला होता. त्यामध्ये आरोपीला ‘सज्ञान’ समजून त्याच्यावर प्रौढांप्रमाणे गुन्हेगारी खटला चालवावा, अशी मागणी करण्यात आली होती. पोलिसांनी काही महत्त्वाचे पुरावे देखील सादर केले होते – सीसीटीव्ही फुटेज, मद्यपानाचे पुरावे आणि ससून रुग्णालयात रक्तनमुना बदलण्याच्या कटात सहभाग, हे सर्व आरोपीचे गंभीर वर्तन दर्शवणारे असल्याचे पोलिसांचे म्हणणे होते.
आरोपीच्या बाजूने वकील प्रशांत पाटील यांनी युक्तिवाद करताना सांगितले की, आरोपीकडून अपघात नकळत घडला असून त्याचे कोणतेही पूर्वगुन्हेगारी वर्तन नव्हते. तसेच, आरोपीला सुधारण्याची संधी देऊन त्याच्यावर बाल न्याय कायद्याच्याच तरतुदीनुसार खटला चालवावा, अशी मागणी केली.
दरम्यान, बाल न्याय मंडळाने बचाव पक्षाचा युक्तिवाद ग्राह्य धरत पुणे पोलिसांचा अर्ज फेटाळला. आरोपी हा घटनेच्या वेळी अल्पवयीन होता आणि त्याला प्रौढ म्हणून खटल्याला सामोरे जाऊन शिक्षा देणे योग्य ठरणार नाही, असे मंडळाने स्पष्ट केले. हा निर्णय प्रकरणातील कायदेशीर प्रक्रिया आणि आरोपीच्या वयाचा विचार करून देण्यात आला असून, आता पुढील सर्व न्यायिक प्रक्रिया बाल न्याय कायद्यानुसारच पार पडणार आहेत.
