उन्हाळ्याच्या सुट्टीत फिरण्याचा प्लॅन करत असाल तर ही बातमी तुमच्यासाठी, एप्रिलमध्ये भेट देण्यासाठी ही आहेत ५ उत्तम ठिकाणे…
पुणे: एप्रिल महिन्यात उन्हाची तीव्रता वाढू लागल्याने अनेकजण शहरातील उकाड्यापासून दूर, थंड आणि निसर्गरम्य ठिकाणी फिरण्याचा प्लॅन करतात. विशेषतः शाळांच्या सुट्ट्यांमुळे कुटुंबासह सहलींचं नियोजन करण्यासाठी हा काळ उत्तम मानला जातो.
भारतमध्ये एप्रिल महिन्यात भेट देण्यासाठी अनेक आल्हाददायक, थंड आणि आकर्षक पर्यटनस्थळे उपलब्ध असून, पर्यटकांना निसर्गसौंदर्याचा मनमुराद आनंद घेण्याची उत्तम संधी मिळते.
उत्तर भारतातील काश्मीर हे एप्रिल महिन्यात पर्यटकांसाठी अत्यंत आकर्षक ठिकाण ठरते. ‘पृथ्वीवरील स्वर्ग’ म्हणून ओळखल्या जाणाऱ्या या प्रदेशात या काळात प्रसिद्ध ट्युलिप गार्डन पूर्ण बहरात असते. श्रीनगर, गुलमर्ग आणि पहलगाम येथे हवामान अत्यंत आल्हाददायक असते, तर सोनमर्गमध्ये बर्फाच्छादित निसर्गसौंदर्याचा आनंद घेता येतो. याशिवाय दाल सरोवर येथे शिकाऱ्यातून फेरफटका मारणे हा पर्यटकांसाठी अविस्मरणीय अनुभव ठरतो.
हिमाचल प्रदेशमधील मनाली हे एप्रिलमध्ये फिरण्यासाठी अत्यंत लोकप्रिय ठिकाण मानले जाते. येथील हिरवाईने नटलेले डोंगर, थंडगार हवामान आणि निसर्गसौंदर्य पर्यटकांना भुरळ घालतात.
साहसी पर्यटनाची आवड असणाऱ्यांसाठी सोलांग व्हॅलीमध्ये पॅराग्लाइडिंग, रिव्हर राफ्टिंगसारख्या रोमांचक अॅक्टिव्हिटीज उपलब्ध आहेत. तसेच रोहतांग पासमध्ये एप्रिल महिन्यातही बर्फाचा अनुभव घेण्याची संधी पर्यटकांना मिळू शकते.
ईशान्य भारतात निसर्गसौंदर्य अनुभवायचे असल्यास सिक्कीम राज्यातील गंगटोक हे उत्तम ठिकाण आहे. एप्रिलमध्ये येथे हवामान आल्हाददायक असते. नाथुला पास, त्सोमगो लेक आणि प्राचीन बौद्ध मठ येथे भेट देताना शांततेचा अनुभव येतो. याशिवाय कंचनजंगा पर्वताचे भव्य दृश्यही येथे पाहायला मिळते.
दक्षिण भारतात केरळमधील मुन्नार आणि तमिळनाडूमधील ऊटी ही हिल स्टेशन एप्रिलमध्ये विशेष लोकप्रिय ठरतात. मुन्नारमधील चहाचे विस्तीर्ण मळे, धुक्याने वेढलेले डोंगर आणि एराविकुलम नॅशनल पार्क पर्यटकांना मंत्रमुग्ध करतात. तर ऊटीमध्ये एप्रिलमध्ये होणारा फ्लॉवर शो, निलगिरी माउंटन रेल्वेचा प्रवास, बोटॅनिकल गार्डन्स आणि पायकारा धबधबा ही ठिकाणे विशेष आकर्षण ठरतात.
दुसरीकडे उत्तराखंडमधील ऋषिकेश हे ठिकाण साहस आणि अध्यात्म यांचा अनोखा संगम अनुभवण्यासाठी प्रसिद्ध आहे. येथे गंगा नदीत रिव्हर राफ्टिंगचा थरार अनुभवता येतो, तर संध्याकाळची गंगा आरती मनाला शांतता आणि समाधान देणारी ठरते.
