हवेलीत बंडखोरांना धडा शिकविण्यासाठी अजित पवारांची मदत ! बंडखोरांच्या हवेली च्या अस्मितेच्या भाषेने राष्ट्रवादीला दमछाक !!

बंडखोरांची ही आत्मसन्मान व स्वाभिमानाची भाषा तालुका स्विकारणार की, राष्ट्रवादी चे नेते या बंडखोरांचे उट्टे काढणार म्हणून निर्णायक तालुक्यातील निवडणूक ही अतितटीच्या वळणावर पोहचली आहे. हवेली बाजार समितीला तालुक्याचे अस्तित्व मिळेल की नाही, निवडणूक होणार नाही इथंपासून सुरूझालेल्या अनिश्चितांना पूर्णविराम मिळून १९ वर्षानंतर बाजार समितीचा रणसंग्राम सुरू झाला आहे. तालुक्यात एक पिढी जाऊन दुसऱ्या पिढीला ही बाजार समितीची निवडणूक पाहण्याचे स्पप्न प्रत्यक्षात उतरले आहे. फक्त यापूर्वी आशिया खंडातील श्रीमंत असलेल्या या बाजार समितीचे किस्से चर्चेने ऐकिवात असले तरी आता मात्र प्रत्यक्षात अनुभवास येऊ लागल्याने निवडणूकीत सत्तेचा सारीपाट कसा राहिल म्हणून प्रचंड उत्सुकता तालुक्यात लागली आहे.

तालुक्यात १९ वर्षे बाजार समिती व १२ वर्षे कारखाना या संस्थांना मतदान करण्याचा अधिकार भूमिपूत्रांना न मिळाल्याने मिळालेल्या या संधीत काय, निर्णय घेणार म्हणून उत्सुकता शिगेला आहे. हवेली बाजार समिती ही सोन्याचे अंडी देणारी कोंबडी म्हणून राजकीय साठेमारीत व सत्तेच्या चक्रात अडकुन तब्बल १९ वर्षे प्रशासकीय राजवटीत अडकून पडल्याने संस्थेला तालुकाचा लाभ अधिकार मिळतो की नाही म्हणून अनेक छुप्या संघर्षाला तोंड देत निवडणूकीपर्यंत पोहचला आहे. न्यायालयीन बाबी , कोर्ट कचेऱ्या, वृत्तपत्रांत सातत्याने बाजार समितीच्या अधिकारासाठी  संघर्ष चालू ठेऊन अखेर १९ वर्षाच्या कालखंडानंतर या संस्थेची निवडणूक सुरू आहे.