पुणेकरांसाठी आनंदाची बातमी! ५ दिवस मोफत चित्रपट पाहण्याची संधी मिळणार, कुठे आणि कधी?, जाणून घ्या संपूर्ण माहिती..
पुणे: चित्रपटप्रेमींसाठी आनंदाची बातमी आहे. मुंबा फिल्म फाऊंडेशनतर्फे २४ ते २८ सप्टेंबर दरम्यान पुण्यात सहाव्या मुंबा आंतरराष्ट्रीय चित्रपट महोत्सवाचे आयोजन करण्यात येणार आहे. या महोत्सवात देशभरातील आणि जागतिक दर्जाचे एकूण १०५ चित्रपट मोफत प्रेक्षकांसमोर दाखविले जातील, अशी माहिती आयोजक जय भोसले यांनी मंगळवारी पत्रकार परिषदेत दिली.
या कार्यक्रमाचे संयोजन वीरेंद्र चित्राव यांनी केले असून त्याचबरोबर संचालक अभिषेक अवचार, सचिव विश्वास शेंबेकर, मराठवाडा कॉलेजचे प्रतिनिधी संतोष शेणई आणि नूतन कुलकर्णी उपस्थित होते. यावेळी फेस्टिव्हलच्या बोधचिन्हाचे अनावरणही करण्यात आले.
केंद्र सरकारच्या माहिती आणि प्रसारण मंत्रालय तसेच राष्ट्रीय चित्रपट विकास महामंडळ यांच्या सहभागाने हा महोत्सव साजरा केला जात आहे. उद्घाटन सोहळा २४ सप्टेंबर रोजी सकाळी १० वाजता राष्ट्रीय चित्रपट संग्रहालय,लॉ कॉलेज रस्त्यावर ज्येष्ठ अभिनेते डॉ. मोहन आगाशे यांच्या हस्ते होणार आहे.
तर समारोप आणि पुरस्कार वितरण सोहळा २८ सप्टेंबर रोजी दुपारी ३ वाजता आयोजित केला आहे. यावेळी लघुचित्रपट निर्माते, तीन मास्टर क्लासेस आणि दिग्दर्शक-निर्मात्यांचा खुला संवाद आणि चर्चासत्रेही घेण्यात येणार आहेत.
चित्रपटांचे प्रदर्शन राष्ट्रीय चित्रपट संग्रहालय, पंडित नेहरू नाट्यगृह आणि मराठवाडा मित्र मंडळाचे कॉमर्स कॉलेज या तीन ठिकाणी केले जाणार असल्याचे संयोजक चित्राव यांनी सांगितले. महोत्सवाचा उद्देश भारतातील चित्रपट इतिहासातील दुर्मीळ चित्रपट, लघुचित्रपट, माहितीपट आणि चित्रपट-संबंधित सामग्रीचे संरक्षण करणे आहे. तसेच भविष्यातील पिढ्यांसाठी हा वारसा जपणे आणि चित्रपटप्रेमींना तसेच विद्यार्थ्यांना प्रशिक्षण देऊन उत्तम निर्माते तयार करण्यास मदत करणे हे महत्त्वाचे लक्ष्य आहे.पुणे: चित्रपटप्रेमींसाठी आनंदाची बातमी आहे. मुंबा फिल्म फाऊंडेशनतर्फे २४ ते २८ सप्टेंबर दरम्यान पुण्यात सहाव्या मुंबा आंतरराष्ट्रीय चित्रपट महोत्सवाचे आयोजन करण्यात येणार आहे. या महोत्सवात देशभरातील आणि जागतिक दर्जाचे एकूण १०५ चित्रपट मोफत प्रेक्षकांसमोर दाखविले जातील, अशी माहिती आयोजक जय भोसले यांनी मंगळवारी पत्रकार परिषदेत दिली.
