शेतकऱ्यांसाठी आनंदाची बातमी! खात्यात उद्या 2000 रुपये खटाखट जमा होणार; तुम्हाला मिळणार की नाही? जाणून घ्या सविस्तर…
मुंबई : शेतकऱ्यांसाठी आनंदाची बातमी समोर आली आहे. बळीराजासाठी उद्याचा दिवस अत्यंत महत्त्वाचा ठरणार असून प्रधानमंत्री किसान सन्मान निधी योजनेच्या प्रतीक्षेत असलेल्या कोट्यवधी लाभार्थ्यांसाठी मोठी घोषणा करण्यात आली आहे.
उद्या, 13 मार्च 2026 रोजी केंद्र सरकार या योजनेचा 22 वा हप्ता शेतकऱ्यांच्या बँक खात्यात थेट जमा करणार आहे. पंतप्रधान नरेंद्र मोदी हे आसाममधील गुवाहाटी येथून एका विशेष कार्यक्रमाद्वारे देशभरातील पात्र शेतकऱ्यांना प्रत्येकी 2000 रुपयांचा लाभ देणार आहेत.
या 22 व्या हप्त्याच्या वितरणानंतर, पीएम-किसान योजनेद्वारे आतापर्यंत वाटप करण्यात आलेली एकूण रक्कम 4.27 लाख कोटी रुपयांच्या ऐतिहासिक टप्प्यावर पोहोचणार आहे.
या विशेष टप्प्यात 2.15 कोटींहून अधिक महिला शेतकऱ्यांचाही समावेश आहे, जे महिला सक्षमीकरणाच्या दृष्टीने महत्त्वाचे पाऊल मानले जात आहे. ही रक्कम थेट लाभ हस्तांतरण प्रणालीद्वारे जमा केली जाणार असल्याने शेतकऱ्यांना तातडीने आर्थिक मदत उपलब्ध होईल. या योजनेचा लाभ घेण्यासाठी शेतकऱ्यांकडे २ हेक्टरपर्यंत लागवडीयोग्य जमीन असणे आणि तिची नोंद अधिकृतपणे असणे अनिवार्य आहे.
नियमांनुसार, एका कुटुंबातील केवळ एकाच पात्र सदस्याला (पती, पत्नी किंवा अल्पवयीन मुले या वार्षिक 6000 रुपयांच्या निधीचा लाभ घेता येतो. उद्याचा निधी कोणत्याही तांत्रिक अडचणीशिवाय मिळावा यासाठी लाभार्थ्यांचे बँक खाते सक्रिय असणे आणि सर्व कागदपत्रांची पूर्तता असणे गरजेचे आहे.
जर तुमचे ई-केवायसी पूर्ण नसेल, तर तुमचा हप्ता अडकण्याची शक्यता आहे. यासाठी शेतकऱ्यांनी सीएससी केंद्रावर जाऊन किंवा पीएम किसान मोबाईल ॲपमधील ‘फेशियल रेकग्निशन’ तंत्रज्ञानाचा वापर करून घरबसल्या ही प्रक्रिया पूर्ण करणे आवश्यक आहे. यासोबतच, आपले बँक खाते आधार कार्डशी लिंक असणे बंधनकारक आहे, जेणेकरून डीबीटी प्रक्रियेत कोणताही अडथळा येणार नाही.
