प्रसिद्ध नृत्यांगना गौतमी पाटीलच्या गाडीनं पुण्यात रिक्षाला उडवलं; 3 जण गंभीर जखमी

पुणे : प्रसिद्ध नृत्यांगना गौतमी पाटील हिच्या गाडीनं पुण्यातील नवले ब्रिज इथे एका रिक्षाला उडवल्याची धक्कादायक माहिती समोर आली आहे.या अपघातामध्ये तिघेजण जखमी झाले असून त्यांना उपचारासाठी दवाखान्यात दाखल करण्यात आले आहे.

समोर आलेल्या माहितीनुसार, नवले येथील वडगाव पुल अपघातामुळे कायम चर्चेत असतो. पुण्यातील मुंबई-बंगळुरी वडगाव येथील एका हॉटेलजवळ उभ्या असलेल्या रिक्षाला गौतमी पाटीलच्या गाडीने धडक दिली. ही धडक इतकी जोरात होती की, रिक्षामध्ये असलेले दोन प्रवासी आणि रिक्षाचालक हे गंभीर जखमी झाले आहेत. अपघातानंतर सिंहगड पोलीस घटनास्थळी दाखल झाले होते, यजखमी झालेल्यांना तातडीने रूग्णालयात नेण्यात आले. ज्यावेळी हा अपघात झाला त्यावेळी गौतमी पाटील ही गाडीमध्ये नव्हती. तिच्या चालकाकडून हा अपघात झाला आहे. अपघाताचे नेमके कारण अद्याप समोर आलेले नाही, चालकाने मद्यप्राशन केले होते की नाही याचा पोलीस तपास करत आहेत. पोलिसांनी गौतमीच्या चालकाला ताब्यात घेतलेलं आहे.

गौतमी पाटील महाराष्ट्रातील आघाडीची नृत्यांगना आणि लोककलाकार आहे. गौतमी ही मूळची सोलापूरमधील आहे. गौतमी अभिव्यक्तीपूर्ण हावभाव आणि रंगमंचावरील आकर्षक सादरीकरणामुळे ती प्रेक्षकांची लाडकी झाली आहे.