पुण्यात पर्यटनासाठी गेलेल्या डॉक्टरचा धबधब्यात बुडून मृत्यू, गाईड वाचवायला गेला पण घडलं आक्रीतंच….
पुणे : पुणे जिल्ह्यातील भिमाशंकरजवळील भिवेगाव देवकुंड धबधब्यात सहा डॉक्टरांची टीम फिरायला गेली होती. यावेळी एका डॉक्टरचा बुडून मृत्यू झाला आहे.त्याचबरोबर बुडलेल्या डॉक्टरला वाचवण्यासाठी गेलेल्या स्थानिक तरुणाचा देखील मृत्यू झाला आहे. या घटनेमुळं परिसरात हळहळ व्यक्त होत आहे. सुबोध करंडे असं मृत्यू झालेल्या डॉक्टरचे नाव आहे. या डॉक्टरला वाचवण्यासाठी गेलेल्या स्थानिक तरुणाचं दिलीप वनघरे असं नाव आहे. दरम्यान, स्थानिकांच्या मदतीनं देवकुंडात रेस्क्यू ऑपरेशन सुरु आहे
याबाबत मिळालेल्या माहितीनुसार, पुण्यातील भीमाशंकरजवळील भिवेगाव येथील प्रसिद्ध देवकुंड धबधब्याच्या परिसरात सुबोध करंडे हे भटकंती करत असताना पाण्याच्या जोरदार प्रवाहात अडकले. तोल जाऊन ते खोल पाण्यात ओढले गेले आणि स्वतःला वाचवण्याचा प्रयत्न करून देखील ते बाहेर पडू शकले नाहीत. अचानक घडलेल्या या घटनेने त्यांच्या सहकार्यासह उपस्थित पर्यटकांमध्ये खळबळ उडाली आहे.
दरम्यान या घटनेदरम्यान स्थानिक तरुण दिलीप वानघरे यांनी क्षणाचाही विलंब न करता पाण्यात उडी घेतली. मात्र पाण्याचा जोरदार प्रवाह, खोलदरीसारखा पात्र भाग यामुळे त्यांनाही जीव वाचवणे शक्य झाले नाही. काही क्षणातच दोघेही पाण्याखाली अदृश्य झाले. या घटनेमुळे पर्यटकांमध्ये भीतीच वातावरण निर्माण झाल आहे.
