श्री एकविरा देवी चैत्री उत्सव 2025 पार्श्वभूमीवर वाहतूक बदलाबाबत जिल्हाधिकाऱ्यांचे आदेश जारी
पुणे : मावळ तालुक्यातील वेहेरगाव, कार्ला येथील श्री एकविरा देवी चैत्री उत्सव 4 एप्रिल रोजी सुरू होत आहे. या कालावधीत जुन्या मुंबई-पुणे महामार्गावरील जड, अवजड वाहतुकीवर काही निर्बंध घालून वाहतूक पर्यायी मार्गाने वळविण्यात येत असल्याचे आदेश जिल्हाधिकारी जितेंद्र डूडी यांनी जारी केले आहेत.
या आदेशानुसार यात्रा कालावधीत कार्ला फाटा ते श्री एकविरा देवी पायथा मंदिर दरम्यान पूर्ण वेळ अवजड व मोठ्या वाहनांना प्रवेश निषेध (नो एंट्री) करण्यात येत आहे. मध्यरात्री १२.०१ वाजल्यापासून ते रात्री १२ वाजेपर्यंत जुना मुंबई-पुणे व पुणे-मुंबई महामार्गावारील कुसगाव बुद्रुक टोलनाका लोणावळा ते वडगाव फाटा, वडगाव मावळ असे अवजड व मोठ्या वाहनांना प्रवेश निषेध करण्यात येत आहे.
जुना मुंबई-पुणे महामार्गावरुन पुणे बाजूकडे जाणारी जड-अवजड व मोठी वाहने यांना लोणावळा येथील कुसगाव बु. टोलनाका मार्गे एक्सप्रेस हायवेने उर्से टोलनाक्यामार्गे पुणे शहराकडे जाण्याकरीता वळविण्यात येणार आहे.
पुण्याकडून मुंबईकडे जाणारी जड अवजड व मोठी वाहने ही वडगाव येथील तळेगाव फाटा येथून उर्से खिंडीतून मुंबईकडे जाण्याकरीता द्रुतगती महामार्गाचा वापर करावा. नागरिकांनी वाहतुकीत केलेल्या बदलाची नोंद घेवून सहकार्य करावे, असे आवाहनही डूडी यांनी केले आहे.
