हवेलीतील ग्रामपंचायतींचे प्रलंबित मुद्रांकशुल्क अनुदान तात्काळ वितरित करा; सभापती युवराज काकडे यांची जिल्हा परिषदेकडे मागणी
पुणे : हवेली पंचायत समितीच्या कार्यक्षेत्रातील ग्रामपंचायतींना मिळणारे मुद्रांकशुल्क अनुदान अद्याप ग्रामपंचायतींना वर्ग न झाल्यामुळे तालुक्यातील गावपातळीवरील विकासकामे ठप्प आहेत. याबाबत हवेली पंचायत समितीचे सभापती युवराज हिरामण काकडे यांनी, पुणे जिल्हा परिषदेचे उपमुख्यकार्यकारी अधिकारी भुषण जोशी यांच्याकडे निवेदनाद्वारे मागणी केली आहे.
मार्च अखेर जवळ येत असताना निधीअभावी विविध विकासकामे रखडली असून पाणीपुरवठा, रस्ते, लाईट, स्वच्छता, तसेच लहान-मोठ्या पायाभूत सुविधांच्या कामांवर थेट परिणाम होत आहे. गावपातळीवर नियोजित कामांना गती देणे कठीण झाले आहे. याअनुषंगाने हवेलीतील सर्वच ग्रामपंचायतींकडून, मुद्रांकशुल्क अनुदानाबाबत पंचायत समितीकडे वारंवार विचारणा केली जात आहे.
दरम्यान राज्य शासनाचा महत्त्वाकांक्षी उपक्रम असलेल्या ‘मुख्यमंत्री समृद्ध पंचायत राज अभियान’ याची मुदत ३१ मार्च २०२६ रोजी संपत आहे. या अभियानांतर्गत राबविण्यात येणाऱ्या विविध योजनांची अंमलबजावणी वेळेत पूर्ण करणे अपेक्षित आहे. परंतू निधीअभावी यातील काही बाबी प्रलंबित राहण्याची शक्यता नाकारता येत नाही.
या पार्श्वभूमीवर हवेली पंचायत समितीच्या कार्यक्षेत्रातील सर्व ग्रामपंचायतींच्या खात्यावर प्रलंबित मुद्रांकशुल्क अनुदान तात्काळ वर्ग करण्यात यावे, अशी मागणी सभापती काकडे यांनी, जिल्हा परिषदेकडे केली आहे. तसेच याबाबत त्वरित कार्यवाही करण्याची विनंती, मा. उपमुख्यकार्यकारी अधिकारी (पंचायत विभाग) यांच्याकडे करण्यात आली आहे.
