वाहकाला मारहाण, अनेक गुन्हे, सुट्टया पैशांवरून राज्यात राडा! एसटी भाडेवाढीवर राज्यातून अनेक तक्रारी, प्रशासन काय निर्णय घेणार?
मुंबई : एसटी महामंडळाने नुकताच भाडेवाढीचा निर्णय घेतला. यामुळे प्रवाशांमधून संताप व्यक्त केला जात आहे. भाडेवाढही अशी केली की सुट्टे पैसे नसल्याने बसमध्ये रोज गोंधळ निर्माण होत आहे. अमरावती जिल्ह्यातील दर्यापूर आगारातील नांदेड बुद्रुक या मार्गावर वाहकाला मारहाण झाल्याचा गुन्हा पोलिसात दाखल करण्यात आला आहे.
अनेक ठिकाणी बाचाबाची झाल्याच्या घटना रोज घडत आहेत. यातून पुढे काही अनर्थ घडू नये, यासाठी खबरदारी म्हणून भाडेवाढ सूत्रात तत्काळ बदल होण्यासाठी एसटीकडून पुन्हा एकदा राज्य परिवहन प्राधिकरणाकडे फेर प्रस्ताव सादर करण्यात यावा, अशी मागणी महाराष्ट्र एस.टी. कर्मचारी काँग्रेसचे सरचिटणीस श्रीरंग बरगे यांनी केली आहे.
यामुळे याकडे सर्वांचे लक्ष लागले आहे. सध्या एक रुपयाच्या पटीत भाडेवाढ करण्याचा आदेश काढला असल्याने सद्या चलनात सुट्या पैशाचे व्यवहार जवळ जवळ बंद झाले आहेत. यामुळे मोठा वाद निर्माण होत आहे. प्रवाशी सुटे पैसे मागितल्यावर देत नाही. तरीही भाडेवाढ करताना प्राधिकरणाकडून एक रुपयाच्या पटीत भाडेवाढ केली.
एसटीला तोटा होण्याची भीती दाखवून अनपेक्षितपणे प्राधिकरणाकडून हा निर्णय लादला गेला असल्याची टीकाही बरगे यांनी केली आहे. यामुळे यामध्ये बदल करण्याची मागणी केली जात आहे. नवीन भाडेवाढ ही पाच रुपयांच्या पटीत असावी, असा स्पष्ट प्रस्ताव एसटीने या पूर्वीच पाठवला असताना त्याला प्राधिकरणातील अधिकाऱ्यांनी त्याकडे दुर्लक्ष केले.
दरम्यान, भाडेवाढ पाचच्या पटीत करण्यासाठी अधिकाऱ्यांना सांगायला हवे. सुट्या पैशांची अडचण येत असल्याचे पुरावे देऊन त्याच प्रमाणे वाहकांकडून आलेल्या तक्रारी व पोलिसांत दाखल झालेले गुन्हे याचे पुरावे सादर करून पुन्हा एकदा प्रस्ताव एसटीकडून पाठवला जावा, अशी मागणी केली गेली आहे.
