पवना धरण परिसरात राहणाऱ्या नागरिकांनो सावधान! प्रशासनाकडून सतर्कतेचा इशारा..
पुणे : पवना धरण परिसरात सुरू असलेल्या जोरदार पावसामुळे धरणात पाण्याची आवक लक्षणीय वाढली असून त्यामुळे जलसंपदा विभागाने पवना नदीच्या काठावर राहणाऱ्या नागरिकांना महत्त्वाचा पूर सल्ला जारी केला आहे.
धरणातून पाण्याचा विसर्ग वाढवण्यात येणार असल्याने नदीकाठच्या रहिवाशांना सतर्क राहण्याचे आवाहन करण्यात आले आहे. शनिवारी सकाळी ८:०० वाजता पवना धरण ८६.३४% भरले होते. पाणलोट क्षेत्रात जोरदार पाऊस सुरू असल्याने धरणात पाण्याची मोठ्या प्रमाणात आवक होत आहे.
दरम्यान, यामुळे धरणातील पाण्याची पातळी नियंत्रित ठेवण्यासाठी अधिकाऱ्यांनी नदीपात्रात पाणी सोडण्यास सुरुवात केली आहे. सध्या धरणाच्या सांडव्यावरून ५,९४० क्युसेक पाणी सोडले जात आहे.
खडकवासला पाटबंधारे विभागाच्या पवना धरण पूर नियंत्रण कक्षाने दिलेल्या माहितीनुसार, सकाळी ९:०० वाजेपर्यंत पाण्याचा विसर्ग टप्प्याटप्प्याने वाढवून ७,४१० क्युसेकपर्यंत पोहोचवला जाण्याची शक्यता आहे. यामुळे नदीच्या पाण्याची पातळी वाढणार असल्याने नदीकाठच्या नागरिकांनी योग्य ती खबरदारी घ्यावी.
दरम्यान, पवना नदीत सोडल्या जाणाऱ्या पाण्याची मात्रा पावसाची तीव्रता आणि पाणलोट क्षेत्रातील पाण्याच्या आवकेनुसार वाढवली किंवा कमी केली जाऊ शकते. त्यामुळे नागरिकांनी परिस्थितीवर लक्ष ठेवावे आणि प्रशासनाकडून येणाऱ्या सूचनांचे पालन करावे.
