Chhatrapati Shivaji Maharaj : मालवणमधील छत्रपती शिवाजी महाराज पुतळा दुर्घटना प्रकरणी तिसऱ्या आरोपीला उत्तर प्रदेशमधून अटक…
Chhatrapati Shivaji Maharaj : मालवण राजकोट येथील छत्रपती शिवाजी महाराज पुतळा कोसळ्याप्रकरणी काल तिसऱ्या आरोपीला अटक करण्यात आल्याची माहिती समोर आली आहे. आरोपी परमेश्वर यादव हा वेल्डर असून त्याने पुतळ्याच्या भागाचे नीट वेल्डिंग केले नसल्याचा त्याच्यावर आरोप आहे.
उत्तरप्रदेश येथील मिर्झापूर येथून त्याला काल अटक करण्यात आली आहे. न्यायालयाने त्याला तीन दिवसांची पोलीस कोठडी सुनावली असल्याची माहिती समोर आली आहे.
सविस्तर माहिती अशी की, राजकोट किल्ल्यावर आठ महिन्यांपूर्वी छत्रपती शिवाजी महाराज यांचा पुतळा बसवण्यात आला होता. देशाचे पंतप्रधान नरेंद्र मोदी यांनी त्याचे उद्घाटन करण्यात आले होते. मात्र २६ ऑगस्ट रोजी हा २८ फुटी पुतळा कोसळला, ज्यानंतर राज्यभरात संतापाची लाट उसळली होती. Chhatrapati Shivaji Maharaj
या प्रकरणी शिवप्रेमींसह विरोधकांनी महायुती सरकारला चांगलेच धारेवर धरले होते. या घटनेनंतर राज्य सरकारने या प्रकरणी सखोल चौकशीचे आदेश दिले होते. ज्यानंतर याप्रकरणी केलेल्या तांत्रिक तपासात पुतळ्याच्या वेगवेगळ्या भागांची जोडणी करताना निकृष्ट दर्जाचे काम केल्याने गंज लागल्याने ही दुर्घटना घडल्याचे समोर आले होते.
दरम्यान, याप्रकरणी या पुतळ्याचा शिल्पकार जयदीप आपटेलाही पोलिसांनी अटक केली आहे. आता उत्तरप्रदेश येथील मिर्झापूर येथून आणखी एका आरोपीला पोलिसांकडून ताब्यात घेण्यात आले आहे.
