डेटींग ॲपवरून तरुणांना बोलवायचे, भेटायला येताच घडायचं भयंकर, पुण्यातील टोळी अखेर ताब्यात, प्रकरण काय?
पुणे : सोशल मीडिया आणि डेटिंग अॅपच्या माध्यमातून तरुणांशी मैत्री करायची आणि त्यांना एकांतात भेटायला बोलावून लुटणाऱ्या एका टोळीचा पर्दाफाश केला आहे. हा पर्दाफाश कोंढवा पोलिसांनी केला असून या प्रकरणी पोलिसांनी पाच जणांना अटक केली आहे.
अटक करण्यात आलेल्या आरोपींमध्ये रोहिल अकील शेख (वय १९, रा. कोंढवा), नुहान नईम शेख (वय १८, रा. कोंढवा), शाहिद शाहनूर मोमीन (वय २५, रा. कात्रज), इशान निसार शेख (वय २५, रा. कात्रज) आणि वाहिद दस्तगीर शेख (वय १८, रा. कोंढवा) अशा पाच जणांचा समावेश आहे. त्यांच्याकडून लूटमार केलेले दागिने, मोबाईल आणि गुन्ह्यात वापरलेली शस्त्रे जप्त केली आहेत.
मिळालेल्या माहितीनुसार, या प्रकरणातील आरोपी डेटिंग अॅपवर बनावट प्रोफाईल तयार करून किंवा ओळख वाढवून तरुणांना जाळ्यात ओढायचे. दरम्यान, ११ जानेवारी रोजी या टोळीने एका तरुणाला रात्रीच्या वेळी भेटायला बोलावलं होतं.
तरुण घटनास्थळी पोहोचताच आरोपींनी त्याला घेरले आणि कोयत्याचा धाक दाखवून जीवे मारण्याची धमकी दिली. त्यांनी तरुणाजवळील सोन्याचे दागिने आणि महागडा मोबाईल हिसकावून घेतला.
इतकेच नव्हे, तर त्याला जबरदस्तीने एटीएममध्ये नेऊन रोख रक्कम काढायला लावून तीदेखील लुटली. कोंढवा पोलिसांनी गुप्त माहितीच्या आधारे सापळा रचून या पाच जणांना अटक केली आहे.
पोलिसांनी केलेल्या तपासात या टोळीने अशाच प्रकारे पुण्यात आणखी दोन ठिकाणी गुन्हे केल्याचे कबूल केले आहे. आरोपींकडून तीन मोबाईल, एक कोयता आणि दोन दुचाकी जप्त करण्यात आल्या आहेत. या टोळीने आणखी किती जणांना लुटले आहे, याचा तपास पोलीस करत असून त्या अनुषंगाने स्वतंत्र गुन्हे दाखल करण्यात आले आहेत. घटनेचा पुढील तपास पोलीस करत आहेत.
