देशाची आर्थिक स्थिती खालवेल , राज्यात अवकाळी व अतिवृष्ठीचा धोका कायम ! ‘भेंडवळ घटबांधणी’ चे भाकीते जाहीर ….!
बुलडाणा : संपूर्ण राज्यातील शेतक-यांचा बुलढाण्यातील घटबांधणीत विश्वास असलेल्या ‘भेंडवळची घटमांडणी’चे भाकीत आज जाहीर करण्यात आले आहे. घटमांडणीत वर्तवण्यात आलेल्या अंदाजावरुन राज्यातील शेतकरी आपल्या वर्षभराचे पीक पाण्याचे नियोजन करत असतात. त्यामुळे या घटमांडणीकडे संपूर्ण महाराष्ट्राचे लक्ष लागून असते.
पाऊस, पीक परिस्थिती, हवामान, राजकीय, आर्थिक, संरक्षण व सामाजिक परिस्थिती याचा वेध घेणारी ही भेंडवळची घटमांडणीचे अंदाज आज वर्तवण्यात आले आहे. आज सकाळी सूर्योदयाच्या वेळी या मांडणीतील वर्षभराचे घटात झालेल्या बदलावरुन वर्षभराचे नियोजन आणि अंदाज वर्तवण्यात आले. तर राज्यात यंदाही अवकाळी आणि अतिवृष्टी पाऊस पडण्याचा अंदाज जाहीर करण्यात आला आहे. तर हे अंदाज ऐकण्यासाठी राज्यभरातील शेतक-यांनी मोठी गर्दी केली होती.
पावसाबाबत अंदाज
जून महिन्यात कमी पाऊस पडणार आहे. त्यामुळे पेरणी उशिरा होईल,जुलै महिन्यात सर्वसाधारण पाऊस पडणार आहे. ,ऑगस्ट महिन्यात चांगला पाऊस पडणार असून, अतिवृष्टी देखील होईल,सप्टेंबर महिन्यात पाऊस कमी असेल ,पण अवकाळी पाऊस भरपूर होणार असून, पिकांचे नुकसान होईल.
पीक पाण्यासंबंधीचे अंदाज
यावर्षी पिकांवर रोगराई राहिल, कापूस पीक मध्यम होईल, कापसात तेजी असेल, ज्वारी सर्वसाधारण राहिल, तूर पीक चांगले असेल, मूग पीक सर्वसाधारण असेल, उडीद मोघम सर्वसाधारण,तीळ सर्वसाधारण मात्र नासाडी होईल , बाजरी सर्व साधारण मात्र नासाडी होईल,तांदुळाचं चांगलं पीक येईल,गहू सर्वसाधारण बाजार भाव तेजीत राहिल,हरभरा अनिश्चित कमी जास्त पीक येईल. मात्र नुकसान सुद्धा होईल.
देशासंबंधीचे अंदाज
संरक्षण मजबूत राहिल, मात्र शेजारील राष्ट्राच्या कुरघोड्या असतील, देशाची आर्थिक परिस्थिती खालावेल, चढउतार होईल.
राजकीय अंदाज
राजा कायम आहे, पण राजाला अडचणींचा सामना करावा लागेल. तसेच राजा कायम तणावात असेल, राजकीय उलथापालथ होत राहिल,नैसर्गिक आपत्ती येत राहतील, भूकंप प्रमाण जास्त असेल
काय आहे भेंडवळ भविष्यवाणी?
पर्जन्यमान, पिकांची स्थिती, शेतीमालाचे दर, देशातील राजकीय आणि आर्थिक स्थितीबाबत भेंडवळमध्ये दरवर्षी भविष्यवाणी करण्याची परंपरा आहे. गेल्या 350 वर्षांपासून या घट मांडणीच्या आधारावर वर्षभराचं राजकीय, सामाजिक, आर्थिक आणि हवामानाचं भविष्य वर्तवलं जात आहे.
