भाजप युवा मोर्चाच्या प्रदेशाध्यक्षावर गुन्हा, महिला पदाधिकाऱ्याला मारहाण व जीवघेणी धमकी दिल्याचा आरोप…
पुणे : भाजपच्या महिला पदाधिकाऱ्याला भारतीय जनता युवा मोर्चाच्या (भाजयुमो) प्रदेशाध्यक्षाच्या नावाने टोळक्याने जिवे मारण्याची धमकी दिल्याचा धक्कादायक प्रकार समोर आला आहे. ही घटना चिंचवड येथे घडली आहे.
याप्रकरणी भाजयुमोचे प्रदेशाध्यक्ष अनुप मोरे यांच्यासह सात जणांविरोधात गुन्हा दाखल करण्यात आला आहे. यात दोन महिलांचाही समावेश आहे. याप्रकरणी ३६ वर्षीय पीडित महिलेने २६ ऑक्टोबर रोजी चिंचवड पोलिस ठाण्यात फिर्याद दिली.
फिर्यादी महिला भाजपाची पदाधिकारी आहे. त्यांच्या फिर्यादीनुसार भाजयुमोचे प्रदेशाध्यक्ष अनुप मोरे (वय ४३, रा. निगडी प्राधिकरण), अनिता कृष्णा तिपाले, एकविरा शरीफ खान, प्रवीण यादव, आशिष राऊत, गौरव गोळे, सागर घोरपडे व जयेश मोरे यांच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी महिला भाजपाची पदाधिकारी आहे. २६ ऑक्टोबर रोजी दुपारी दोनच्या सुमारास फिर्यादी महिला त्यांच्या ओळखीतील एका व्यक्तीला भेटण्यासाठी चिंचवड येथे गेल्या होत्या. दरम्यान, बंगल्याबाहेर संशयितांनी आमचा दादा अनुप मोरे येथे असताना तू येथे का आलीस, असे विचारून धमकी दिली.फिर्यादी महिला पुन्हा बंगल्यात परत गेली.
एक व्यक्ती मोटार घेऊन फिर्यादी महिलेला सोडायला आला असता, अनेक महिलांनी फिर्यादी महिलेच्या मोटारीला घेराव घातला. फिर्यादी महिला तक्रार देण्यासाठी चिंचवड पोलीस ठाण्यात गेली असता दोन महिलांनी त्यांना मारहाण आणि शिवीगाळ केली. पोलीस उपनिरीक्षक सुजाता पाटील तपास करत आहेत.
