नव्या वर्षात बदलणार मोठे नियम! शेतकऱ्यांचं कर्ज, UPI ते गॅस सिलेंडरच्या किमती…जाणून घ्या नेमके काय बदलणार
मुंबई : २०२४ वर्ष संपायला फक्त काही दिवस उरले असून, नवीन वर्ष २०२५ च्या स्वागताची जगभर तयारी सुरू आहे. नवीन वर्षासह १ जानेवारी २०२५ पासून देशात अनेक मोठे बदल लागू होतील ज्यांचा प्रभाव प्रत्येक घरात आणि प्रत्येक व्यक्तीच्या खिशावर होईल.
तसेच या बदलांमध्ये स्वयंपाकघरात वापरल्या जाणाऱ्या एलपीजी सिलिंडरच्या किंमतीपासून ते UPI पेमेंटपर्यंतच्या नियमांचा समावेश आहे. नव वर्षाच्या स्वागताला बाहेर पडण्याआधी १ जानेवारी २०२५ पासून होणाऱ्या बदलांबद्दल जाणून घ्या. नव्या वर्षाच्या पहिल्या तारखेपासून होणाऱ्या बदलांचा तुमच्यावर काय परिणाम होणार ते जाणून घ्या…
शेअर मार्केटशी संबंधित नियम..
सेन्सेक्स, सेन्सेक्स-५० आणि बँकेक्सच्या मासिक एक्स्पायरीमध्ये बदल करण्यात आले आहेत. आता दर आठवड्याला शुक्रवारी नव्हे तर मंगळवारी एक्सपायरी होईल तर, तिमाही आणि सहामाही करार शेवटच्या मंगळवारी एक्सपायरी होतील. दुसरीकडे, NSE निर्देशांकाने निफ्टी50 मासिक करारांसाठी गुरुवार निश्चित केला आहे.
पेन्शनचे पैसे काढण्याची पद्धत बदलणार..
नवीन वर्ष पेन्शनधारकांना दिलासा देणारा ठरणार आहे. १ जानेवारी २०२५ पासून कर्मचारी भविष्य निर्वाह निधी संघटनेने (EPFO) पेन्शन काढण्याचे नियम सोपे केले आहेत. आता पेन्शनधारकांना देशातील कोणत्याही बँकेतून पेन्शन काढता येईल, ज्यासाठी त्यांना कोणत्याही अतिरिक्त पडताळणीची गरज भासणार नाही.
कारच्या किंमतीत वाढ…
नवीन वर्षात कार खरेदी करणे सामान्यांना आणखी महाग होणार आहे. १ जानेवारी २०२५ पासून मारुती सुझुकी, ह्युंदाई, महिंद्रा, होंडा, मर्सिडीज-बेंझ, ऑडी आणि BMW सारख्या प्रमुख ऑटोमोबाईल कंपन्या वाहनांच्या किमती ३ टक्क्यांनी वाढवणार असून कंपन्यांनी उत्पादन खर्चात वाढ झाल्याचे कारण सांगितले आहे. त्यामुळे, तुम्ही नवीन वर्षात कार घेण्याचा विचार करत असाल तर तुम्हाला जास्त खर्च करावा लागू शकतो.
ॲमेझॉन प्राइम मेंबरशिपचे नवीन नियम..
ॲमेझॉन प्राइम सबस्क्रिप्शनच्या नियमांमध्ये बदल जाहीर करण्यात आले आहेत, जे १ जानेवारी २०२५ पासून लागू होतील. नवीन नियमांनुसार, प्राइम व्हिडिओ एका प्राइम खात्यातून फक्त दोन टीव्हीवर स्ट्रीम केला जाऊ शकेल तर, तिसऱ्या टीव्हीवर प्राइम व्हिडिओ पाहायचा असेल तर त्याला अतिरिक्त सबस्क्रिप्शन घ्यावे लागेल. याआधी प्राइम सबस्क्रिप्शन एकाच खात्यातून पाच उपकरणांवरून व्हिडिओ स्ट्रीम करू शकत होते.
शेतकऱ्यांना कर्ज..
१ जानेवारी २०२५ पासून होणारा पुढील बदल हा शेतकऱ्यांशी संबंधित आहे. वर्षाच्या पहिल्या दिवसापासून RBI शेतकऱ्यांना कोणत्याही हमीशिवाय दोन लाख रुपयांपर्यंतचे कर्ज देईल. अलीकडेच आरबीआयने शेतकऱ्यांसाठी असुरक्षित कर्जाची मर्यादा वाढवण्याची घोषणा केली होती त्यामुळे, आता त्यांना १.६ लाख नाहीतर दोन लाख रुपयांपर्यंत कर्ज मिळू शकेल.
UPI 123पे वर नवीन व्यवहार मर्यादा..
रिझर्व्ह बँक ऑफ इंडिया ने फीचर फोन वापरकर्त्यांसाठी सुरू केलेल्या यूपीआय 123Pay सेवेमध्ये व्यवहार मर्यादा वाढवण्यात आली आहे. या अंतर्गत याआधी कमाल ५,००० रुपयांपर्यंतचे व्यवहार करता येत होते पण आता ही मर्यादा १० हजार रुपयांपर्यंत वाढवण्यात आली असून ही सुविधा १ जानेवारी २०२५ पासून लागू होईल.
LPG आणि ATF च्या किंमती बदलणार…
वर्षाच्या पहिल्याच दिवसापासून देशात पाच मोठे बदल लागू होतील. त्यापैकी पहिला एलपीजी सिलेंडर आणि हवाई इंधनाच्या किंमतीत सुधारणा केली जाईल. तेल विपणन कंपन्या महिन्याच्या पहिल्या दिवशी हे बदल करतात मात्र, गेल्या काही महिन्यांपासून घरगुती गॅसच्या दरात कोणताही बदल झालेला नाही, जी सामान्यांसाठी दिलासादायक बाब आहे.
