मोठी बातमी! वैष्णवी हगवणे प्रकरणात पुणे कोर्टाचा मोठा निर्णय; सासू नंणदेसह पतीच्या मित्राचा जामीन अर्ज फेटाळला..

पुणे : पुण्यातील वैष्णवी हगवणे आत्महत्या प्रकरणाबाबत महत्त्वाची माहिती समोर आली आहे.हुंड्यासाठी मानसिक-शारीरिक छळ करुन वैष्णवी हगवणे हिला आत्महत्या करण्यास प्रवृत्त केल्याप्रकरणी तिची सासू, नणंद आणि पतीच्या मित्राचा जामीन अर्ज पुणे न्यायालयाने फेटाळला आहे. त्यामुळे त्यांच्या अडचणीत वाढ झाली आहे.

वैष्णवीची सासू लता राजेंद्र हगवणे (वय ५४), नणंद करिश्मा राजेंद्र हगवणे (२१, दोघी रा. भुकूम, ता. मुळशी) आणि नीलेश रामचंद्र चव्हाण (३५, रा. कर्वेनगर) यांनी ॲड. विपुल दुशिंग यांच्या मार्फत न्यायालयात अर्ज केला होता.त्याला विशेष सरकारी वकील उज्ज्वला पवार आणि तक्रारदारांचे वकील शिवम निंबाळकर यांनी विरोध केला होता. अखेर पुणे कोर्टाने मोठा निर्णय घेत त्यांना दणका दिला आहे. त्यांनी केलेला जामीन अर्ज फेटाळण्यात आला आहे.हुंडाबळी हा समाजाला मोठा कलंक आहे. नऊ महिन्यांच्या बाळाची आई दबावाशिवाय असा टोकाचा निर्णय घेऊ शकत नाही. आरोपींवर कट कारस्थान रचणे, आत्महत्येला प्रवृत्त करणे, पुरावे नष्ट करणे आणि आरोपींना लपवण्याचे गंभीर आरोप आहेत. त्यामुळे आरोपींना जामीनावर सोडल्यास साक्षीदारांवर दबाव येण्याची किंवा पुराव्यात छेडछाड होण्याची शक्यता आहे. पीडितेच्या हक्कासोबत समाजहितही लक्षात घेणे आवश्यक आहे. आरोपींना जामीन दिल्यास समाजहिताला बाधा येऊ शकते,’ अशी गंभीर निरीक्षणं नोंदवून अतिरिक्त सत्र न्यायाधीश के. पी. क्षीरसागर यांनी हा आदेश दिला आहे.

दरम्यान पीडितेच्या अंगावर 30 जखमा शवविच्छेदन अहवालात आढळल्या असून, ११ ते १६ मे या दरम्यान तिचा क्रूर छळ केला जात होता. आरोपी नीलेशही हुंड्याच्या प्रत्येक चर्चेवेळी उपस्थित होता, त्याने शशांक आणि करिश्माच्या मोबाइलमधील सीमकार्ड नष्ट केली आहेत. कॉल डिटेल्स रेकॉर्ड आणि आर्थिक व्यवहारातून करिश्मा आणि नीलेशमधील निकटचं नातं लक्षात येतं, असा युक्तिवाद विशेष सरकारी वकील आणि तक्रारदारांच्या वकिलांनी केला. तो ग्राह्य धरून न्यायालयाकडून आरोपींचा जामीन अर्ज फेटाळण्यात आला आहे.