मोठी बातमी! ठाकरेंच्या ‘मातोश्री’ बाहेर ड्रोनच्या अचानक घिरट्या ; काय आहे प्रकरण?
मुंबई: शिवसेना ठाकरे गटाचे पक्षप्रमुख उद्धव ठाकरे यांचे निवासस्थान असलेल्या ‘मातोश्री’वर ड्रोन द्वारे नजर ठेवल्याचा धक्कादायक प्रकार समोर आल्यानंतर राजकीय वर्तुळात खळबळ उडाली आहे. ड्रोनच्या माध्यमातून त्यांच्यावर नजर ठेवली जात असल्याची चर्चा आता राजकीय वर्तुळात रंगली आहे. मात्र यावर मुंबई पोलिसांनी स्पष्टीकरण दिल आहे. एमएमआरडीएने परवानगी घेऊनच बीकेसी आणि खेरवाडी परिसरात ड्रोन उडवले जात असल्याच त्यांनी सांगितले आहे.
समोर आलेल्या माहितीनुसार, मातोश्री आणि एमएमआरडीए कार्यालयाच्या मधल्या रस्त्यावर ड्रोन घिरट्या घालत असल्याचे सुरक्षारक्षकांच्या दृष्टीस पडले. त्यावेळी त्यांनी हवेत उडणारा या ड्रोन चा व्हिडिओ शूट केला. या ड्रोनच्या माध्यमातून उद्धव ठाकरे यांना भेटायला येणाऱ्या व्यक्तींवर नजर ठेवली जात असल्याचा आरोप ठाकरे गटातील नेत्यांनी केला. मात्र पोलिसांनी यावर स्पष्टीकरण देऊन चर्चांना पूर्णविराम दिला आहे. हे ड्रोन एमएमआरडीएचे असल्याचे पोलिसांनी सांगितले. या प्रकरणी एमएमआरडीएने परवानगी घेतली होती. खेरवाडी, वांद्रे-कुर्ला संकुलातील परिसरातील सर्वेक्षणासाठी हे ड्रोन उडवण्यात आल्याची माहिती समोर आली आहे. दोन ड्रोन यासाठी उडवण्यात आले होते.
दरम्यान या परिसरात कोणत्याही प्रकारचे ड्रोन किंवा हवाई साधन उडवण्यास कायद्याने बंदी आहे. मुंबईतील अनेक ठिकाणी सुरक्षिततेच्या दृष्टीने ड्रोन उडवण्यास मनाई आहे. अशातच आता मातोश्रीवर ड्रोनने नजर ठेवल्याची घटना समोर आल्याने खळबळ उडाली.शिवसेना ठाकरे पक्षाचे नेते, आमदार आदित्य ठाकरे यांनी मुंबई पोलिसांनी दिलेल्या स्पष्टीकरणावरच प्रश्न उपस्थित केले आहेत. आदित्य ठाकरे यांनी पाच प्रश्न उपस्थित करत सर्वेक्षणाच्या दाव्यावर सवाल उपस्थित केले आहेत.
