मोठी बातमी! चंद्रकांत पाटलांना नडलेल्या बालवडकरांची भाजपला सोडचिट्टी, अखेर अजित पवारांच्या राष्ट्रवादीकडून उमेदवारी
पुणे : पुण्यात महानगरपालिका निवडणुकीच्या तोंडावर राजकीय घडामोडींना चांगलाच वेग आला आहे. विधानसभा निवडणुकीवेळी चंद्रकांत पाटील यांच्या विरोधात भूमिका घेणाऱ्या अमोल बालवडकर यांना भाजपने उमेदवारी नाकारल्यानंतर त्यांनी भाजपला सोडचिट्टी दिली.त्यानंतर आता बालवडकर यांना उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेस पक्षाकडून उमेदवारी देण्यात आली आहे. या निर्णयामुळे पुण्यातील राजकीय वर्तुळात चर्चेला उधाण आले आहे.
पुणे महानगरपालिका निवडणुकीसाठी भाजपने जवळपास सर्व उमेदवार निश्चित केले आहेत. उमेदवार जाहीर न करता थेट उमेदवारांना एबी फॉर्म वाटप भाजपकडून करण्यात आले आहे.हे वाटप करताना भाजपने अनेकांचे पत्ते कट केले आहेत.आता भाजपमधून बाहेर पडत अमोल बालवडकर यांनी राष्ट्रवादीच्या अजित पवार गटात प्रवेश करत आपल्या भूमिकेवर ठाम विश्वास व्यक्त केला आहे. त्यांना पक्षाकडून उमेदवारी ही जाहीर करण्यात आली आहे.
उमेदवारी जाहीर झाल्यानंतर प्रतिक्रिया देताना अमोल बालवडकर म्हणाले की, माझ्या आयुष्यातील कठीण काळात अजित पवार यांनी माझ्यावर विश्वास ठेवला आहे. हा विश्वास मी निश्चितच सार्थ ठरवेन. कोणताही पक्ष मोठा व्हावा, मात्र त्या पक्षाने पाय जमिनीवर ठेवले पाहिजेत, असे मत त्यांनी व्यक्त केले. भाजपामध्ये कार्यरत असताना अनेक अडचणींचा सामना करावा लागला, असे सांगत त्यांनी थेट भाजपवर टीका केली.
पुढे बोलताना अमोल बालवडकर म्हणाले की, आता अमोल बालवडकर भाजपाला दाखवून देईल की खरा कार्यकर्ता म्हणजे काय असतो. या निवडणुकीत भाजपाला ‘धोबीपछाड’ देणार असून, ही कृती वचपा काढण्यासाठी नाही तर धोका देण्यासाठी असल्याचे त्यांनी स्पष्ट केले. त्यांच्या या आक्रमक भूमिकेमुळे आगामी निवडणुकीत राजकीय समीकरणे बदलण्याची शक्यता वर्तवली जात आहे.
अमोल बालवडकर यांच्या राष्ट्रवादीतील प्रवेशामुळे आणि उमेदवारीमुळे पुण्यातील निवडणूक लढत अधिक रंगतदार होण्याची चिन्हे दिसत आहेत.
