गुढीपाडव्याच्या दिवशी सोन्याच्या भावात मोठी घसरण, ग्राहकांना दिलासा, खरेदीसाठी गर्दी…
पुणे : ऐन गुढीपाडव्याच्या शुभ मुहूर्तावर सराफा बाजारातून अनपेक्षित अशी दिलासादायक बातमी समोर आली आहे. वाढ होण्याची शक्यता व्यक्त केली जात असताना उलट सोनं आणि चांदीच्या दरात मोठी घसरण नोंदवण्यात आली आहे.
जागतिक बाजारातील चढ-उतार, मजबूत डॉलर आणि गुंतवणूकदारांकडून झालेली नफावसुली यामुळे ही घसरण झाल्याचे तज्ज्ञांचे मत आहे. सणाच्या दिवशी दर कमी झाल्याने ग्राहकांमध्ये आनंदाचे वातावरण असून खरेदीसाठी मोठी गर्दी पाहायला मिळत आहे.
आजच्या व्यवहाराच्या सुरुवातीलाच सोन्याच्या किंमतीत प्रति दहा ग्रॅम तब्बल 808 रुपयांची घसरण झाली. या घसरणीनंतर 24 कॅरेट सोन्याचा दर 1,52,217 रुपये प्रति दहा ग्रॅम या पातळीवर आला आहे. दरात झालेल्या या घसरणीमुळे दागिने खरेदी करण्यासाठी ग्राहकांनी सराफा बाजारात सकाळपासूनच गर्दी केली आहे.
चांदीच्या दरातही घट नोंदवण्यात आली असून त्यामुळे गुंतवणूकदार आणि ग्राहक दोघांनाही दिलासा मिळाला आहे. सणासुदीच्या काळात सहसा दर वाढण्याची प्रवृत्ती असते, मात्र यावेळी झालेली घसरण ही ग्राहकांसाठी सुवर्णसंधी मानली जात आहे.
चांदीच्या दरातही मोठी घसरण नोंदवण्यात आली आहे. प्रति किलो तब्बल 2,957 रुपयांची घट झाल्याने चांदीचा दर आता 2,45,237 रुपये प्रति किलोवर आला आहे. या घसरणीमुळे चांदी खरेदी करणाऱ्या ग्राहकांना दिलासा मिळाला आहे.
दरम्यान, राज्यातील प्रत्यक्ष सराफा बाजारात चांदीचा भाव सुमारे 2,75,000 रुपये प्रति किलोपर्यंत असल्याचे दिसून येत आहे. औद्योगिक क्षेत्राकडून मागणी कमी होणे आणि आंतरराष्ट्रीय बाजारात वाढलेली विक्री ही या घसरणीमागची प्रमुख कारणे असल्याचे बाजारातील जाणकारांचे मत आहे.
या घसरणीमागे काही महत्त्वाची जागतिक आणि आर्थिक कारणे कारणीभूत ठरत आहेत. सर्वप्रथम, अमेरिकन फेडरल रिझर्व्हने व्याजदर स्थिर ठेवण्याचा निर्णय घेतला असून महागाई नियंत्रणासाठी कठोर भूमिका कायम ठेवली आहे. यामुळे डॉलर मजबूत झाला असून त्याचा थेट परिणाम सोन्याच्या दरांवर झाला आहे.
दुसरे महत्त्वाचे कारण म्हणजे आंतरराष्ट्रीय बाजारात मौल्यवान धातूंमध्ये आलेली मंदी, ज्याचे पडसाद भारतीय बाजारपेठेतही उमटले आहेत.
तसेच, मागील काही काळात सोन्याचे दर उच्चांकावर पोहोचल्याने अनेक गुंतवणूकदारांनी नफावसुली करण्यास सुरुवात केली आहे. या तिन्ही घटकांमुळे सोन्या-चांदीच्या किमतींवर दबाव येऊन दरात घसरण झाल्याचे तज्ज्ञांचे मत आहे.
