गॅस बुकिंगमध्ये मोठा बदल; अतिरिक्त सिलिंडरसाठी कारण देणे अनिवार्य, नवे नियम जाहीर…

पुणे : एलपीजी ग्राहकांसाठी एक महत्त्वाची अपडेट समोर आली आहे. देशातील आघाडीची तेल कंपनी भारत पेट्रोलियम कॉर्पोरेशन लिमिटेडने गॅस सिलिंडर बुकिंगसाठी नवी प्रक्रिया लागू केली आहे.

विशेषतः ज्या ग्राहकांनी वर्षातील 12 सिलिंडरचा कोटा पूर्ण केला आहे, त्यांना आता अतिरिक्त सिलिंडर बुक करताना काही आवश्यक प्रश्नांची उत्तरे द्यावी लागणार आहेत. या नव्या नियमामुळे अतिरिक्त गॅस बुकिंगवर अधिक नियंत्रण ठेवण्याचा कंपनीचा उद्देश आहे.

ज्या ग्राहकांनी वर्षभरातील 12 सिलिंडरचा कोटा पूर्ण केला आहे, त्यांच्यासाठी पुढील गॅस बुकिंगची प्रक्रिया बदलण्यात आली आहे. आता अतिरिक्त सिलिंडर नोंदणी करण्यासाठी ग्राहकांना ‘हॅलो BPCL’ या मोबाईल ॲप्लिकेशनवर जाऊन काही विशिष्ट प्रश्नांची उत्तरे देणे अनिवार्य करण्यात आले आहे.

रविवारी अचानक लागू करण्यात आलेल्या या नव्या प्रणालीबाबत गॅस वितरक आणि सर्वसामान्य ग्राहकांना कोणतीही पूर्वसूचना देण्यात आली नव्हती. त्यामुळे सकाळपासून नेहमीप्रमाणे मोबाईलवरून गॅस बुक करण्याचा प्रयत्न करणाऱ्या अनेक ग्राहकांना अडचणींचा सामना करावा लागला आणि त्यांचे प्रयत्न वारंवार अपयशी ठरले.

या गोंधळामुळे अनेकांनी थेट गॅस एजन्सीकडे धाव घेतली. मात्र, तेथील कर्मचाऱ्यांनाही या बदलाची माहिती नसल्याने संभ्रमाचे वातावरण निर्माण झाले. अखेर एजन्सी चालकांनी कंपनीच्या वरिष्ठ अधिकाऱ्यांशी संपर्क साधल्यानंतर या नव्या प्रक्रियेबाबत माहिती स्पष्ट झाली.

अतिरिक्त गॅस मिळवण्यासाठी कंपनीने ग्राहकांसमोर काही सविस्तर प्रश्नांची यादी ठेवली आहे. यामध्ये प्रामुख्याने तुमच्या कुटुंबातील सदस्यांची एकूण संख्या सहापेक्षा जास्त आहे का, असा सवाल विचारण्यात आला आहे. तसेच, घरी अचानक कोणी नातेवाईक किंवा पाहुणे मुक्कामाला आले आहेत का, याव्यतिरिक्त कुटुंबात लग्नकार्य, एखादी मोठी मेजवानी किंवा इतर कोणताही विशेष कौटुंबिक सोहळा आयोजित करण्यात आला आहे का, आणि इतर घरगुती वापराची कारणे कोणती आहेत, याची सविस्तर माहिती ॲपवर भरणे आता आवश्यक बनले आहे.

या संपूर्ण परिस्थितीबाबत माहिती देताना ऑल इंडिया एलपीजी डिस्ट्रिब्युटर्स असोसिएशनचे राज्य सचिव आदर्श गुप्ता यांनी स्पष्ट केले की, एका आर्थिक वर्षात ग्राहकांना जास्तीत जास्त 12 गॅस सिलिंडर मिळण्याची तरतूद आहे. सध्या अनेक कुटुंबांनी ही निश्चित मर्यादा पूर्ण केली आहे.

त्यामुळे अतिरिक्त गॅस सिलिंडरची गरज असल्यास ग्राहकांना आता स्मार्टफोनवर संबंधित ॲप डाउनलोड करून त्यामध्ये विचारलेल्या कारणांची नोंद करणे अनिवार्य करण्यात आले आहे. या प्रक्रियेची पूर्तता केल्यानंतरच पुढील गॅस बुकिंग स्वीकारले जाणार असल्याचे त्यांनी सांगितले.