मतचोरीच्या प्रकरणात आता राहुल गांधी यांच्यानंतर मनसे अध्यक्ष राज ठाकरे यांची उडी! घेतला मोठा निर्णय…

मुंबई : राहुल गांधींनी बनावट मतांचा विषय हाती घेतला असतानाच महाराष्ट्रात याच मुद्द्यावरून मनसेने राज्याचे निवडणूक अधिकारी एस चोकलिंगम यांची भेट घेतली आहे. महापालिका आणि नगरपालिकांच्या निवडणुकी आधी मतदार याद्यांच्या पुनर्परीक्षणाची मागणी मनसेने केली आहे.

मनसेचे शिष्टमंडळ राज्याचे मुख्य निवडणूक अधिकारी एस. चोकलिंगम यांना भेटले आणि त्यांनी मतदार याद्यांच्या पुनर्परीक्षणाची मागणी केली आहे. आगामी महापालिका आणि नगरपालिकांच्या निवडणुका लक्षात घेता, मतदार यादीतील त्रुटी दूर करणे आवश्यक असल्याचे मनसेचे म्हणणे आहे.

मनसेने आपल्या मागणीमध्ये मतदार यादीतील बनावट नावे, डबल नावे आणि चुकीच्या पत्त्यांचा समावेश असलेल्या नावांना वगळण्याची विनंती केली आहे. ही प्रक्रिया तातडीने सुरू करावी, अशी त्यांची मागणी आहे. मतदार याद्यांमध्ये मोठ्या प्रमाणात चुका असल्याचा आरोप मनसेने केला आहे, ज्यामुळे निवडणुकांमध्ये गैरप्रकार होण्याची शक्यता आहे. त्यामुळे या याद्यांचे पुनर्परीक्षण करणे महत्त्वाचे आहे.

या भेटीदरम्यान, मनसेच्या नेत्यांनी महापालिकांच्या निवडणुकीत व्हीव्हीपॅट वापरण्याची मागणी केली आहे. स्थानिक स्वराज्य संस्थांच्या निवडणुकीत सध्या निवडणूक आयोग व्हीव्हीपॅटचा वापर करत नाही, त्यामुळे मतदाराला आपले मत योग्यरित्या नोंदवले गेले आहे की नाही, हे पाहता येत नाही. यामुळे मतदारांमध्ये संशय निर्माण होतो, असे मनसेने म्हटले आहे. व्हीव्हीपॅटमुळे निवडणूक प्रक्रियेत अधिक पारदर्शकता येईल, अशी त्यांची भूमिका आहे.

याच संदर्भात, मनसेचे नेते बाळा नांदगावकर यांनी निवडणूक ईव्हीएमऐवजी मतपत्रिकेवर घेण्याची मागणी केली आहे. अनेक नागरिकांना निवडणूक प्रक्रियेवर विश्वास नाही आणि ईव्हीएममध्ये गैरप्रकार होत असल्याचा संशय त्यांना वाटतो, असे ते म्हणाले. सत्ताधारी पक्ष ठाकरे बंधू एकत्र आले तरी आम्ही जिंकणार असे दावे करत आहेत, मग मतपत्रिकेवर मतदान घ्या, असे आव्हान नांदगावकर यांनी सत्ताधाऱ्यांना दिले आहे.