Accident News : अपघातांची मालिका सुरूच! नगर-कल्याण महामार्गावर मोठा अपघात, तरुणीसह महिलेचा जागीच मृत्यू, एक जण गंभीर..
Accident News पुणे : अपघातामध्ये गेल्या काही दिवसांपासून मोठी वाढ झाल्याचे दिसून येत आहे. पुणे जिल्ह्यातून भीषण अपघाताची घटना समोर आली आहे. पुणे जिल्ह्यातील नगर-कल्याण महामार्गावर भरधाव वेगात जाणाऱ्या पिकअपने पायी जाणाऱ्या तरुणीसह दुचाकीला जोरदार धडक दिली. (Accident News)
या भीषण अपघातामध्ये तरुणीसह दुचाकीवरील महिलेचा जागीच मृत्यू झाला आहे. तर दुचाकीस्वार गंभीर जखमी झाला आहे. जखमी झालेल्या व्यक्तीला तातडीने उपचारासाठी आळेफाटा येथील रुग्णालयात दाखल करण्यात आले आहे.
ऋतुजा अशोक डुंबरे (वय १९ वर्ष) आणि सविता गीताराम तांबे (वय ४५ वर्ष) अशी मृत महिलांची नावे आहेत. तर गीताराम नामदेव तांबे (वय ५२ वर्ष) असं जखमी दुचाकीस्वाराचं नाव आहे.
हा भीषण अपघात बुधवारी (ता.२०) सायंकाळच्या सुमारास नगर-कल्याण महामार्गावरील ओतूर परिसरामध्ये घडला. ऐन गणेशोत्सवाच्या काळात अशी घटना घडल्याने परिसरात हळहळ व्यक्त केली जात आहे.
मिळलेल्या माहिती नुसार, मृत ऋतुजा डुंबरे ही रस्त्याने घरी चालत जात होती. त्याचवेळी गीताराम तांबे आणि त्यांची पत्नी सविता हे दोघे पती-पत्नी दुचाकीवरुन आळेफाट्याच्या दिशेने जात होते. अचानक भरधाव वेगात आलेल्या पिकअपने रस्त्याने चाललेल्या तरुणीसह आणि दुचाकीवरील पती-पत्नीला धडक दिली.
ही धडक इतकी भीषण होती, की यामध्ये दुचाकीवरील महिला आणि पायी चाललेल्या तरुणीचा जागीच मृत्यू झाला. त्याचवेळी पिकअप वाहन रस्त्याच्या दुसऱ्या बाजूला जाऊन पलटी झाला. पघातानंतर पिकअप चालकाने घटनास्थळावरून धूम ठोकली. ओतूर पोलीस त्याचा शोध घेत आहे.
दरम्यान या अपघाताची माहिती मिळताच ओतूर पोलिसांनी तातडीने घटनास्थळी धाव घेतली आणि या प्रकरणाचा तपास सुरू केला आहे. दोन्ही महिलांचे मृतदेह शवविच्छेदनासाठी रुग्णालयात पाठवण्यात आले.
