नाशिकच्या वादात तिसऱ्याची एन्ट्री ; पालकमंत्री पदाचा तिढा सुटणार?
पुणे : गेल्या काही दिवसांपासून नाशिकच्या पालकमंत्रीपदावरून शिवसेना शिंदे गट आणि भाजप यांच्यात वाद सुरू असतानाच आता यात राष्ट्रवादीच्या अजित पवार गटाने एन्ट्री केली आहे.ज्येष्ठ नेते आणि मंत्री छगन भुजबळ यांच्या एन्ट्रीनं महायुतीमधील पालकमंत्री पदाचा तिढा आणखीनच वाढणार असल्याची शक्यता वर्तवली जात आहे.
भारतीय स्वातंत्र्यदिनाच्या झेंडावंदनाच्या जबाबदारीवरून या वादाला अधिक उधाण आलं आहे. नाशिक जिल्ह्यातील मुख्य कार्यक्रमासाठी झेंडावंदनाची जबाबदारी भाजपचे गिरीष महाजन यांच्याकडे सोपवण्यात आली आहे. तर, गोंदिया जिल्ह्यातील झेंडावंदनासाठी छगन भुजबळ यांचं नाव जाहीर झालं आहे. मात्र, नाशिक जिल्ह्यात राष्ट्रवादीचे तब्बल सात आमदार असतानाही, गोंदियाला का जायचं अशी भूमिका छगन भुजबळ यांनी घेतली असल्याची माहिती समोर आली आहे.
दरम्यान नाशिकच्या पालकमंत्री पदासाठी शिवसेना शिंदे गटाकडून दादा भुसे, भाजपचे गिरीश महाजन यांनी दावा केला आहे.त्यानंतर आता यामध्ये छगन भुजबळांनीदेखील दावा केल्याने हा वाद आता आणखीनच चिघळणार आहे.
