अखेरच्या क्षणी अजित पवारांना मोठा धक्का; राष्ट्रवादीच्या महानगराध्यक्षचा तडकाफडकी राजीनामा, काय आहे कारण?

पुणे : राज्यातील 29 महानगरपालिकांच्या निवडणुकीसाठी अर्ज दाखल करण्याची आज शेवटची तारीख आहे. त्यामुळे ज्या इच्छुकांना उमेदवारी मिळाली आहे ते उमेदवारी अर्ज दाखल करण्यात व्यस्त आहेत. मात्र काहींना उमेदवारी न मिळाल्याने ते नाराज झाले आहे. अशातच आता जळगावमध्ये अजित दादांना मोठा धक्का बसला आहे. राष्ट्रवादीचे महानगराध्यक्ष अभिषेक पाटील यांनी तडकाफडकी राजीनामा दिला आहे. त्यामुळे राजकीय वर्तुळात चर्चांना उधाण आल आहे.

समोर आलेल्या माहितीनुसार, महापालिका निवडणुकीच्या तोंडावरच अजित पवारांच्या राष्ट्रवादीचे महानगराध्यक्ष अभिषेक पाटील यांनी तडकाफडकी राजीनामा दिला आहे. महापालिका निवडणुकीत जागा लढण्यावरून जिल्हाध्यक्ष संजय पवार आणि माजी मंत्री गुलाबराव देवकर यांच्यासोबत मतभेद झाल्याने राजीनामा दिल्याची माहिती समोर आली आहे.

दरम्यान अभिषेक पाटलांच्या आई तसेच राष्ट्रवादी अजित पवार गटाच्या महिला पदाधिकारी कल्पनाबाई पाटील यांची पदाधिकाऱ्यांकडून समजूत काढण्याची प्रयत्न सुरू आहे. आता त्यांची नाराजी दूर होणार का हे पाहणे देखील महत्त्वाचे ठरणार आहे. त्यामुळे आता राष्ट्रवादीच्या नेत्यांमधील अंतर्गत वाद चव्हाट्यावर आला आहे. याचा फटका पक्षाला आगामी निवडणुकीत बसण्याची शक्यता आहे.

.जिल्हाध्यक्ष संजय पवार, माजी मंत्री गुलाबराव देवकर, माजी आमदार मनीष जैन हे पाटील यांनी समजावण्याचा प्रयत्न करत आहेत. त्यांची जी काही नाराजी असेल ती दूर होईल अशी माहिती राष्ट्रवादीचे जिल्हाध्यक्ष संजय पवार यांनी दिली आहे. त्यामुळे आता पाटील यांनी नाराजी दूर करण्यात पदाधिकाऱ्यांना यश येते का ते पाहणे महत्त्वाचे ठरणार आहे.