अंगणवाडी सेविका-मदतनीसांसाठी मोठी अपडेट! प्रोत्साहन भत्त्याचे निकष बदलणार, आदिती तटकरेंचे निर्देश

मुंबई : राज्यातील अंगणवाडी सेविका आणि मदतनीसांसाठी महत्त्वाची बातमी समोर आली आहे. त्यांच्या प्रोत्साहन भत्त्याच्या निकषांमध्ये सुधारणा करण्याचे निर्देश महिला व बालविकास मंत्री आदिती तटकरे यांनी संबंधित अधिकाऱ्यांना दिले आहेत. कर्मचारी संघटनांकडून या निकषांमध्ये बदल करण्याची मागणी सातत्याने केली जात होती. या पार्श्वभूमीवर मंत्रालयात विशेष बैठक घेण्यात आली.

या बैठकीत अंगणवाडी सेविका आणि मदतनीसांच्या कामाचे मूल्यमापन करताना पोषण, आरोग्य, पूर्वशालेय शिक्षण, लाभार्थ्यांची उपस्थिती आणि नियमित गृहभेटी या महत्त्वाच्या बाबींचा विचार करण्यावर चर्चा झाली. तसेच प्रोत्साहन भत्त्याच्या सुधारित निकषांबाबत सविस्तर प्रस्ताव तातडीने तयार करण्याच्या सूचना आदिती तटकरे यांनी अधिकाऱ्यांना दिल्या.

सेविका आणि मदतनीसांना किती मिळतो प्रोत्साहन भत्ता?

राज्यात सध्या 0 ते 6 वर्षे वयोगटातील बालकांचे तसेच गर्भवती आणि स्तनदा मातांचे आरोग्य व पोषण यांची काळजी घेण्यासाठी अंगणवाडी यंत्रणा कार्यरत आहे. राज्यात 1,08,627 अंगणवाडी सेविका आणि 1,05,470 अंगणवाडी मदतनीस कार्यरत आहेत.

उपलब्ध माहितीनुसार, अंगणवाडी सेविकांना दरमहा 1,500 ते 2,000 रुपये, तर अंगणवाडी मदतनीसांना दरमहा 500 ते 1,000 रुपये प्रोत्साहन भत्ता दिला जातो. हा भत्ता 1 ऑक्टोबर 2024 पासून लागू करण्यात आला आहे.

आता या भत्त्याचे वाटप आणि कर्मचाऱ्यांच्या कामाचे मूल्यमापन करण्यासाठीचे निकष अधिक सुटसुटीत आणि कालानुरूप करण्यावर भर दिला जात आहे. मात्र, सुधारित निकषांचा अंतिम निर्णय आणि त्यांची अंमलबजावणी याबाबत पुढील अधिकृत माहिती महत्त्वाची ठरणार आहे.

इतर योजनांचाही घेतला आढावा

मंत्रालयातील बैठकीत एकात्मिक बालविकास सेवा योजना आयुक्तालयामार्फत राबविण्यात येणाऱ्या विविध कल्याणकारी योजनांचाही आढावा घेण्यात आला. यामध्ये अतिरिक्त आहार योजना, आदर्श अंगणवाडी योजना आणि बेबी केअर किट योजनेचा समावेश होता.

2026-27 या आर्थिक वर्षात या योजनांची प्रभावी अंमलबजावणी करण्यासाठी आवश्यक नियोजन करण्याच्या सूचनाही मंत्री आदिती तटकरे यांनी दिल्या.

या बैठकीला एकात्मिक बालविकास सेवा योजना आयुक्त माधवी सरदेशमुख, सहसचिव वी. रा. ठाकूर यांच्यासह महिला व बालविकास विभागातील वरिष्ठ अधिकारी उपस्थित होते.

दरम्यान, प्रोत्साहन भत्त्याच्या निकषांमध्ये सुधारणा करण्याबाबत प्रस्ताव तयार करण्याचे निर्देश देण्यात आले आहेत. सुधारित निकष नेमके कसे असतील आणि त्याचा अंगणवाडी कर्मचाऱ्यांना काय फायदा होईल, हे अंतिम निर्णयानंतर स्पष्ट होणार आहे.