कल्याणच्या गेस्ट हाऊसमध्ये सुरू होता भलताच धंदा; पोलिसांच्या छाप्यात १५ महिलांची सुटका
कल्याण : कल्याण रेल्वे स्थानक परिसरातील एका गेस्ट हाऊसमध्ये सुरू असलेल्या कथित देहविक्री रॅकेटचा पोलिसांनी पर्दाफाश केला आहे. पोलिसांच्या समाजसेवा शाखेने गुरुवारी दुपारी केलेल्या कारवाईत १५ महिलांची सुटका करण्यात आली, तर महिलांना या व्यवसायात ढकलल्याच्या आरोपावरून दोन जणांना अटक करण्यात आली. या प्रकरणी महात्मा फुले चौक पोलीस ठाण्यात गुन्हा दाखल करण्यात आला असून, पुढील तपास सुरू आहे.
गेस्ट हाऊसमध्ये पोलिसांची अचानक धाड
कल्याण रेल्वे स्थानक परिसरातील झुंझाराव मार्केटमधील अन्नपूर्णा गेस्ट हाऊसमध्ये देहविक्रीचा व्यवसाय सुरू असल्याची माहिती पोलिसांना मिळाली होती. या माहितीच्या आधारे पोलिसांच्या समाजसेवा शाखेने गुरुवारी दुपारी संबंधित ठिकाणी छापा टाकला. या कारवाईदरम्यान कथित रॅकेट उघडकीस आले.
मॅनेजर आणि वेटरला अटक
पोलिसांच्या माहितीनुसार, गेस्ट हाऊसचा मॅनेजर आणि एक वेटर महिलांना पैशांचे प्रलोभन देऊन देहविक्रीच्या व्यवसायात सहभागी होण्यास भाग पाडत असल्याचा आरोप आहे. या प्रकरणी पोलिसांनी दोघांना अटक केली असून, १५ महिलांची सुटका करण्यात आली आहे.
या प्रकरणी अनैतिक मानवी व्यापार प्रतिबंधक कायद्यांतर्गत (PITA) गुन्हा दाखल करण्यात आला आहे. या रॅकेटमध्ये आणखी कोणाचा सहभाग आहे का, याचा तपास पोलीस करत आहेत.
रेल्वे स्थानकाजवळच सुरू होता प्रकार
अन्नपूर्णा गेस्ट हाऊस कल्याण जंक्शन परिसरात असल्याने या कारवाईला विशेष महत्त्व प्राप्त झाले आहे. या स्थानकावरून अनेक लांब पल्ल्यांच्या रेल्वेगाड्या धावतात. स्थानकाजवळच हा प्रकार सुरू असल्याचे समोर आल्यानंतर परिसरात खळबळ उडाली. पोलिसांच्या पुढील तपासातून या प्रकरणातील अधिक माहिती समोर येण्याची शक्यता आहे.
