राणा सूर्यवंशी हल्ला प्रकरणाला नवं वळण; तीन मित्रांनीच सुपारी दिल्याचा संशय, सीसीटीव्ही फुटेज पोलिसांच्या हाती
बारामती : राणा शिपिंग कॉर्पोरेशनचे मालक राणा सूर्यवंशी यांच्यावरील हल्ला प्रकरणात तपासादरम्यान नवी माहिती समोर आल्याचा दावा केला जात आहे. सूर्यवंशी यांच्या जवळच्या तीन मित्रांनीच हल्ल्याचा कट रचल्याचा पोलिसांना संशय असल्याची माहिती सूत्रांनी दिली आहे. धक्कादायक बाब म्हणजे, हल्ल्यानंतर हेच मित्र त्यांना रुग्णालयात घेऊन जाण्यासह त्यांच्या संपर्कात असल्याचेही सांगितले जात आहे.
दौंडजवळील ढाब्यावर सुपारी दिल्याचा संशय
पोलिसांच्या सूत्रांनुसार, विशाल धुमाळ, सागर पवार आणि रोहित तुपे या तिघांनी स्वप्निल कांबळे आणि निनाद महाडिक यांची दौंडजवळील एका ढाब्यावर भेट घेतल्याचा संशय आहे. या भेटीदरम्यान दोन लाख रुपयांची सुपारी दिल्याचा आरोप करण्यात आला आहे.
या प्रकरणात ‘डिफेंडर’ गाडीचाही उल्लेख तपासात समोर आला आहे. हल्ल्याच्या दिवशी ही गाडी सूर्यवंशी यांच्यासोबत होती आणि त्यांना सुरुवातीला बारामतीतील रुग्णालयात नेण्यासाठीही तिचा वापर झाल्याचे सांगितले जात आहे. हे तिघे पुण्यातील रुबी हॉल रुग्णालयातही सूर्यवंशी यांच्यासोबत उपस्थित असल्याची माहिती समोर आली आहे.
या हालचालींच्या पार्श्वभूमीवर पोलिसांकडून संबंधित व्यक्तींची भूमिका तपासली जात आहे. मात्र, या तिघांवरील आरोपांची अधिकृत पुष्टी होणे बाकी आहे.
आतापर्यंत पाच जणांना अटक
या प्रकरणात पोलिसांनी आतापर्यंत पाच जणांना अटक केल्याची माहिती आहे. त्यात सूर्यवंशी यांचा चालक ज्ञानेश्वर शिंदे याचाही समावेश आहे. शिंदे याने स्वप्निल कांबळेला सुपारी दिल्याचा आरोप आहे. त्यानंतर स्वप्निलने एका १७ वर्षीय विधिसंघर्षग्रस्त बालकाला आणि पार्थ अवथळे याला या कटात सहभागी केल्याचा संशय तपास यंत्रणांना आहे.
दुसरीकडे, निनाद महाडिक याने हल्ल्यासाठी दुचाकी उपलब्ध करून दिल्याचा आरोप आहे. या प्रकरणातील आरोपींची चौकशी सुरू असून, हल्ल्यामागील नेमके कारण शोधण्याचा प्रयत्न पोलीस करत आहेत.
हल्ल्याच्या दिवशी सुरक्षा मागे सोडल्याची माहिती
राणा सूर्यवंशी यांना ‘वाय’ दर्जाची सुरक्षा व्यवस्था पुरवण्यात आली असल्याचे सांगितले जाते. मात्र, हल्ल्याच्या दिवशी त्यांनी घटनास्थळापासून सुमारे दहा किलोमीटर आधी सुरक्षारक्षकांना थांबवले होते, अशी माहिती समोर आली आहे.
जमिनीची पाहणी आणि व्यवहारासंदर्भात चर्चा करायची असल्याचे कारण त्यांनी दिल्याचा उल्लेख तक्रारीत असल्याचे सांगितले जाते. त्यावेळी त्यांच्यासोबत एक पोलीस जवान होता. हल्ल्यानंतर आरोपींनी या जवानाच्या हाताला चावा घेऊन पळ काढल्याचा आरोपही तक्रारीत करण्यात आला आहे.
‘आम्ही तुमचे फॅन आहोत’ म्हणत जवळ आल्याचा आरोप
१९ ऑक्टोबर रोजी संध्याकाळी बारामती विमानतळाजवळ सूर्यवंशी यांच्यावर हल्ला झाल्याची माहिती आहे. सीसीटीव्ही फुटेज आणि तपासातील माहितीनुसार, पार्थ अवथळे आणि एका विधिसंघर्षग्रस्त बालकाने ‘आम्ही तुमचे फॅन आहोत’ असे सांगून सूर्यवंशी यांच्याजवळ जाण्याचा प्रयत्न केला, असा आरोप आहे.
त्यानंतर गोळीबाराचा प्रयत्न करून धारदार शस्त्राने त्यांच्या हातावर वार करण्यात आल्याचे तक्रारीत नमूद असल्याची माहिती आहे. या प्रकरणातील सीसीटीव्ही फुटेज आणि इतर पुराव्यांच्या आधारे पोलीस तपास करत आहेत.
व्हॉट्सॲप चॅट आणि इतर पुराव्यांची तपासणी
या प्रकरणात संबंधित व्यक्तींमधील व्हॉट्सॲप संभाषणांचीही तपासणी केली जाण्याची शक्यता आहे. हल्ल्याचा कट नेमका कसा रचला गेला, त्यामागे कोणते कारण होते आणि संशयित व्यक्तींची भूमिका काय होती, याचा तपास पोलीस करत आहेत.
दरम्यान, जवळच्या मित्रांवर व्यक्त करण्यात आलेला संशय आणि सुपारी दिल्याचे आरोप तपासाच्या अधीन आहेत. या प्रकरणातील अंतिम निष्कर्ष अधिकृत तपासातूनच स्पष्ट होतील.
