कृषी विद्यार्थ्यांसाठी मोठी बातमी! २७ डिसेंबरला राज्यभर साजरा होणार ‘कृषी विद्यार्थी दिन’; दत्तात्रय भरणेंची घोषणा, अनेक वर्षांची मागणी अखेर मान्य
मुंबई : राज्यातील कृषी शिक्षण घेणाऱ्या विद्यार्थ्यांसाठी आनंदाची बातमी समोर आली आहे. देशाचे पहिले केंद्रीय कृषिमंत्री डॉ. पंजाबराव ऊर्फ भाऊसाहेब देशमुख यांच्या जयंतीनिमित्त २७ डिसेंबर हा दिवस आता ‘राज्य अॅग्रीकॉस – कृषी विद्यार्थी दिन’ म्हणून साजरा करण्यात येणार आहे. राज्याचे कृषिमंत्री दत्तात्रय भरणे यांनी याबाबत घोषणा केली असून, कृषी विभागाने २२ ऑक्टोबर २०२६ रोजी यासंदर्भातील शासन निर्णय जारी केला आहे. त्यामुळे कृषी विद्यार्थ्यांची अनेक वर्षांपासूनची मागणी अखेर पूर्ण झाली आहे.
कोण आहेत डॉ. पंजाबराव देशमुख?
डॉ. पंजाबराव देशमुख यांनी देशाच्या कृषी क्षेत्राच्या विकासासाठी महत्त्वपूर्ण योगदान दिले. स्वतंत्र भारताचे पहिले केंद्रीय कृषिमंत्री म्हणून त्यांनी कृषी शिक्षण, संशोधन आणि शेतकऱ्यांच्या हितासाठी विविध उपक्रम राबवले. कृषी विद्यापीठांची संकल्पना पुढे नेणे, भारतीय कृषी अनुसंधान परिषदेच्या पुनर्गठनासाठी योगदान देणे आणि १९५५ मध्ये ‘भारत कृषक समाज’ या संस्थेची स्थापना करणे, अशा महत्त्वाच्या कार्यांमध्ये त्यांचा सहभाग होता. त्यांच्या कार्यामुळे कृषी क्षेत्राला नवी दिशा मिळाली.
कृषी विद्यार्थ्यांची मागणी अखेर मान्य
डॉ. पंजाबराव देशमुख यांच्या जयंतीदिनी कृषी विद्यार्थी दिन साजरा करण्यात यावा, अशी राज्यातील अॅग्रीकॉस विद्यार्थ्यांची अनेक वर्षांपासून मागणी होती. अखेर राज्य सरकारने या मागणीला मान्यता दिली आहे. या निर्णयामुळे कृषी शिक्षण घेणारे विद्यार्थी, कृषी पदवीधर, संशोधक आणि कृषी क्षेत्रात काम करणाऱ्या तरुणांना प्रोत्साहन मिळणार आहे.
कृषी शिक्षण आणि संशोधनातील योगदानाचा गौरव करणे, विद्यार्थ्यांच्या ज्ञानाचा शेतीच्या विकासासाठी उपयोग करून घेणे आणि नव्या संकल्पनांना चालना देणे, हा या निर्णयामागील प्रमुख उद्देश आहे.
आधुनिक शेतीसाठी विद्यार्थ्यांना मिळणार प्रेरणा
आज शेतीसमोर हवामान बदल, पाणीटंचाई आणि बाजारपेठेतील चढ-उतार यांसारखी अनेक आव्हाने आहेत. अशा परिस्थितीत कृषी विद्यार्थ्यांनी आधुनिक तंत्रज्ञान, संशोधन आणि नावीन्यपूर्ण प्रयोगांच्या माध्यमातून शेती अधिक सक्षम करण्यासाठी पुढाकार घेणे आवश्यक आहे. ‘राज्य अॅग्रीकॉस – कृषी विद्यार्थी दिन’ या उपक्रमातून विद्यार्थ्यांना त्यांच्या जबाबदारीची जाणीव होईल आणि कृषी क्षेत्रातील संशोधनाला प्रोत्साहन मिळेल, असा विश्वास कृषिमंत्री दत्तात्रय भरणे यांनी व्यक्त केला.
२७ डिसेंबरला साजरा होणारा हा दिवस केवळ एका जयंतीपुरता मर्यादित न राहता कृषी शिक्षण, संशोधन आणि शेतीच्या भविष्यासाठी योगदान देणाऱ्या विद्यार्थ्यांचा गौरव करण्याची संधी ठरणार आहे. शासनाच्या या निर्णयामुळे कृषी विद्यार्थ्यांमध्ये उत्साहाचे वातावरण निर्माण झाले आहे.
