कोकण रेल्वेचं वेळापत्रक बदललं! आजपासून वंदे भारत, तेजससह ५७ गाड्यांच्या वेळांत बदल; पाहा नवं टाइमटेबल
पुणे : पावसाळा संपल्यानंतर कोकण रेल्वे मार्गावरून प्रवास करणाऱ्या हजारो प्रवाशांसाठी महत्त्वाची बातमी समोर आली आहे. रेल्वे प्रशासनाने पावसाळी वेळापत्रक संपवून नियमित वेळापत्रक लागू केले आहे.
यानुसार मुंबईहून कोकण आणि गोव्याच्या दिशेने धावणाऱ्या वंदे भारत, तेजस, कोकणकन्या, जनशताब्दी आणि मांडवी एक्स्प्रेससह एकूण ५७ गाड्यांच्या वेळांमध्ये बदल करण्यात आले आहेत. त्यामुळे कोकणात किंवा गोव्यात जाण्याचा बेत आखणाऱ्या प्रवाशांनी प्रवासापूर्वी गाड्यांच्या नव्या वेळा तपासून घेणे आवश्यक आहे.
प्रमुख गाड्यांच्या वेळांमध्ये बदल; पाहा नवे वेळापत्रक
१. सीएसएमटी-मडगाव वंदे भारत एक्स्प्रेस
मुंबईतील सीएसएमटी स्थानकावरून सकाळी ५:२५ वाजता सुटणारी वंदे भारत एक्स्प्रेस दुपारी १:१० वाजता मडगावला पोहोचेल. परतीच्या प्रवासात ही गाडी मडगावहून दुपारी २:४० वाजता सुटून रात्री १०:२५ वाजता सीएसएमटीला पोहोचेल.
२. सीएसएमटी-मडगाव तेजस एक्स्प्रेस
तेजस एक्स्प्रेस सीएसएमटी स्थानकावरून सकाळी ५:५० वाजता सुटेल आणि दुपारी ३:०० वाजता मडगाव स्थानकावर पोहोचेल.
३. सीएसएमटी-मडगाव कोकणकन्या एक्स्प्रेस
कोकणकन्या एक्स्प्रेस मुंबईतील सीएसएमटी स्थानकावरून रात्री ११:०२ वाजता सुटेल. ही गाडी दुसऱ्या दिवशी सकाळी ९:४५ वाजता मडगावला पोहोचेल.
४. सीएसएमटी-मडगाव जनशताब्दी एक्स्प्रेस
जनशताब्दी एक्स्प्रेस सीएसएमटी स्थानकावरून सकाळी ५:१० वाजता सुटेल आणि दुपारी २:३० वाजता मडगावला पोहोचेल.
५. सीएसएमटी-मडगाव मांडवी एक्स्प्रेस
मांडवी एक्स्प्रेस मुंबईतील सीएसएमटी स्थानकावरून सकाळी ७:१० वाजता सुटेल. ही गाडी सायंकाळी ७:३० वाजता मडगाव स्थानकावर पोहोचेल.
प्रवासापूर्वी वेळा तपासण्याचे रेल्वे प्रशासनाचे आवाहन
पावसाळी वेळापत्रक संपल्यानंतर नियमित वेळापत्रक लागू झाल्याने गाड्यांच्या वेळा आणि वेगामध्ये बदल करण्यात आले आहेत. त्यामुळे प्रवाशांनी प्रवासाला निघण्यापूर्वी संबंधित गाडीची सुटण्याची वेळ, थांबे आणि धावण्याचे दिवस तपासून घ्यावेत, असे आवाहन कोकण रेल्वे प्रशासनाने केले आहे.
गाड्यांचे अद्ययावत वेळापत्रक रेल्वेच्या अधिकृत संकेतस्थळावर किंवा स्थानकांवरील सूचना फलकांवर तपासता येईल. ऐनवेळी होणारी गैरसोय टाळण्यासाठी प्रवाशांनी नव्या वेळापत्रकानुसारच आपल्या प्रवासाचे नियोजन करावे.
