5000 कोटींची रक्कम… सुप्रिया सुळे यांनी लाडकी बहीण योजनेबद्दल केला मोठा खुलासा; थेट सरकारवर गंभीर सवाल

मुंबई : मुख्यमंत्री माझी लाडकी बहीण योजनेतील कथित गैरव्यवहाराच्या मुद्द्यावरून खासदार सुप्रिया सुळे यांनी सरकारवर टीका केली आहे. योजनेतील अर्जांची छाननी नेमकी कशी झाली, असा सवालही त्यांनी उपस्थित केला आहे.

सुप्रिया सुळे यांनी सोशल मीडियावर पोस्ट करत माहिती अधिकारातून समोर आलेल्या आकडेवारीचा हवाला दिला. त्यांच्या म्हणण्यानुसार, या आकडेवारीतून योजनेच्या अंमलबजावणीतील कथित अनागोंदी आणि सार्वजनिक पैशांच्या वापराबाबत प्रश्न उपस्थित होतात. या प्रकरणात शासनाने जनतेच्या पैशांचा विनियोग नेमका कसा करण्यात आला, याबाबत स्पष्टीकरण द्यावे, अशी मागणी त्यांनी केली.

5 हजार कोटींच्या रकमेवरून सवाल

अपात्र लाभार्थ्यांच्या खात्यात जमा झालेली सुमारे 5 हजार कोटी रुपयांची रक्कम वसूल न करता माफ करण्याची तयारी सुरू असल्याचे काही वृत्तांमध्ये नमूद करण्यात आले आहे. यावर सुप्रिया सुळे यांनी आक्षेप घेतला आहे.

ही रक्कम राज्यातील करदात्यांच्या पैशातून आलेली असल्याचे सांगत, प्राथमिक पडताळणी प्रक्रियेत झालेल्या कथित निष्काळजीपणाची जबाबदारी कोणाची, असा सवाल त्यांनी केला आहे.

82 लाख की 92 लाख? आकडेवारीवरून सुळेंचा सवाल

माहिती अधिकारातून मिळालेल्या माहितीनुसार 92 लाख लाभार्थी अपात्र ठरल्याचे वृत्त प्रसिद्ध झाले आहे.

मात्र, प्रशासनाकडून किंवा सरकारकडून सांगितल्या जाणाऱ्या आकडेवारीत आणि RTIमधून समोर आलेल्या आकडेवारीत फरक असल्याचा दावा सुप्रिया सुळे यांनी केला आहे. त्यामुळे नेमकी अधिकृत आकडेवारी कोणती, असा प्रश्न त्यांनी उपस्थित केला.

आधार आणि आयकर प्रणालीसारख्या यंत्रणा उपलब्ध असतानाही अपात्र व्यक्तींच्या खात्यात पैसे जमा होईपर्यंत प्रशासनाच्या पातळीवर पडताळणी कशी झाली, असा सवालही त्यांनी केला.

गरजू महिलांचा हक्क हिरावल्याचा दावा

छाननी प्रक्रियेतील कथित त्रुटींमुळे पात्र आणि गरजू महिलांना तांत्रिक कारणांमुळे योजनेच्या लाभापासून वंचित राहावे लागल्याचा दावाही सुप्रिया सुळे यांनी केला आहे.

श्वेतपत्रिका काढण्याची मागणी

लाडकी बहीण योजनेबाबत सरकारने कोणतीही माहिती लपवू नये आणि योजनेची अधिकृत व स्पष्ट आकडेवारी जनतेसमोर जाहीर करावी, अशी मागणी सुप्रिया सुळे यांनी केली आहे.

तसेच, योजनेबाबत श्वेतपत्रिका प्रसिद्ध करावी आणि अपात्र लाभार्थ्यांना वितरित झालेल्या निधीची निष्पक्ष चौकशी करावी, अशी मागणीही त्यांनी केली आहे.

दरम्यान, लाडकी बहीण योजनेच्या लाभार्थ्यांची छाननी आणि अपात्र लाभार्थ्यांना वगळण्याचा मुद्दा यापूर्वीही चर्चेत राहिला आहे. त्यामुळे आता सुप्रिया सुळे यांनी उपस्थित केलेल्या प्रश्नांवर सरकारकडून काय स्पष्टीकरण दिले जाते, याकडे लक्ष लागले आहे.