सोन-चांदी खरेदीदारांसाठी सुवर्णसंधी! १८ वर्षांचा विक्रम मोडला; एका महिन्यात तब्बल १९,७०० रुपयांनी स्वस्त
पुणे : सोन्याच्या किमतींमध्ये सुरू असलेल्या घसरणीने आता ऐतिहासिक वळण घेतले आहे. ऑक्टोबर २००८ नंतर प्रथमच इतकी मोठी मासिक घसरण नोंदवली गेली असून गेल्या महिन्यातच सोन्याचा भाव तब्बल १९,७०० रुपयांनी कमी झाला आहे. त्यामुळे गुंतवणूकदारांसह सर्वसामान्य ग्राहकांमध्येही मोठी चर्चा रंगली आहे.
आंतरराष्ट्रीय बाजारात १ जुलै रोजी सोन्याचा भाव प्रति औंस ४,००५ डॉलरवर उघडला होता. मात्र त्यानंतर दिवसभरात २२ डॉलरपेक्षा जास्त घसरण होत तो ३,९८५ डॉलरपर्यंत खाली आला. विशेष म्हणजे सोन्याने ४,००० डॉलरची महत्त्वाची पातळीही गमावली आहे.
देशांतर्गत वायदे बाजारातही याचा परिणाम दिसून आला. वर्षाच्या सुरुवातीला १० ग्रॅम सोन्याचा भाव १.९२ लाख रुपयांपर्यंत पोहोचला होता. मात्र जून महिन्यातच मोठी घसरण होऊन तो १.४० लाख रुपयांच्या आसपास आला. मुंबई, पुणे, नागपूरसह अनेक शहरांमध्ये २४ कॅरेट सोन्याचे दर १.४० लाख रुपयांच्या घरात आहेत.
तज्ज्ञांच्या मते, वाढती महागाई, अमेरिकेत व्याजदर वाढीची शक्यता आणि मजबूत होत असलेला डॉलर यामुळे सोन्यावरील दबाव वाढला आहे. याशिवाय अनेक गुंतवणूकदार सोन्यातील गुंतवणूक कमी करून इतर पर्यायांकडे वळत असल्यानेही दर घसरत आहेत. दरम्यान, चांदीच्या किमतींमध्येही मोठी घसरण नोंदवली गेली असून बाजारातील अस्थिरता कायम आहे.
