कॉर्पोरेट जग हादरलं! जेवणाच्या बहाण्याने लोणावळ्याला नेऊन महिला कर्मचाऱ्याचा लैंगिक छळ; पुण्यात खळबळ, मॅनेजर अटकेत
पुणे : पुण्यातील कॉर्पोरेट क्षेत्रातून पुन्हा एकदा धक्कादायक आणि संतापजनक घटना समोर आली आहे. औंध परिसरातील एका खासगी इन्शुरन्स कंपनीत कार्यरत असलेल्या महिला कर्मचाऱ्याचा तिच्याच वरिष्ठ मॅनेजरकडून लैंगिक छळ झाल्याचा गंभीर आरोप करण्यात आला आहे. या प्रकरणामुळे शहरात मोठी खळबळ उडाली असून कॉर्पोरेट सुरक्षा व्यवस्थेवर प्रश्नचिन्ह निर्माण झाले आहे.
मिळालेल्या माहितीनुसार, आरोपी मॅनेजर मोहम्मद ऊर्फ जाफर सय्यद हा ‘स्टार युनियन दै-इची लाईफ इन्शुरन्स कंपनी’मध्ये वरिष्ठ पदावर कार्यरत होता. पदाचा गैरवापर करत त्याने पीडित महिला कर्मचाऱ्याशी सुरुवातीपासूनच अनैतिक वर्तन सुरू केल्याचा आरोप आहे. कामाच्या निमित्ताने ओळख वाढवून त्याने वारंवार फोन करून अशोभनीय, वैयक्तिक आणि आक्षेपार्ह टिप्पणी करत मानसिक त्रास दिला.
पीडितेच्या तक्रारीनुसार, आरोपी तिच्यावर सतत दबाव टाकत होता आणि कामाच्या वेळेबाहेरही संपर्क साधत असे. हळूहळू हा त्रास वाढत गेला. आरोपीने “जेवायला बाहेर जाऊ” असा बहाणा करून तिला लोणावळा येथे नेले. तेथे एकटे गाठल्यानंतर त्याने तिच्यासोबत गैरवर्तन करून विनयभंग केल्याचा गंभीर आरोप तक्रारीत करण्यात आला आहे.
या घटनेनंतर घाबरलेल्या पीडित तरुणीने हिंजवडी पोलीस ठाणे गाठून संपूर्ण प्रकाराची माहिती दिली. पोलिसांनी तक्रार गांभीर्याने घेत तत्काळ गुन्हा दाखल केला आणि आरोपी मोहम्मद ऊर्फ जाफर सय्यद याला अटक केली आहे. सध्या त्याची पोलिसांकडून चौकशी सुरू आहे.
या प्रकरणामुळे पुण्यातील कॉर्पोरेट क्षेत्रात प्रचंड खळबळ उडाली आहे. वरिष्ठ पदावरील व्यक्तीकडूनच असे प्रकार घडल्याने महिला कर्मचाऱ्यांच्या सुरक्षिततेबाबत गंभीर प्रश्न उपस्थित झाले आहेत. अनेक कर्मचारी वर्गात भीतीचे वातावरण निर्माण झाले असून कंपनी स्तरावरही अंतर्गत तपास सुरू असल्याची माहिती मिळत आहे.
पोलिसांकडून या प्रकरणाचा अधिक तपास सुरू असून, आरोपीच्या पूर्वीच्या वर्तनाबाबतही चौकशी केली जात आहे. पुढील काही दिवसांत या प्रकरणात आणखी महत्त्वाची माहिती समोर येण्याची शक्यता आहे.
