‘प्रेमविवाहाचा राग की सन्मानाची शिक्षा?’ कल्याणमध्ये विवाहित मुलीच्या हत्येप्रकरणी वडिलांना अटक; चौकशीत धक्कादायक खुलासा
कल्याण : कल्याण पश्चिमेतील पारेकरवाडी परिसरात घडलेल्या एका हृदयद्रावक घटनेने संपूर्ण शहर हादरले आहे. आंतरजातीय प्रेमविवाह केल्याचा राग मनात धरून एका वडिलांनी स्वतःच्या विवाहित मुलीची हत्या केल्याचा आरोप समोर आला असून, या प्रकरणातील फरार आरोपीला बाजारपेठ पोलिसांनी अखेर अटक केली आहे.
रचना रॉयल इमारतीत काही दिवसांपूर्वी घडलेल्या या घटनेत गायत्री वसईकर या तरुणीचा मृत्यू झाला होता. हत्येनंतर तिचे वडील विनोद वसईकर घटनास्थळावरून पसार झाले होते. या घटनेनंतर परिसरात मोठी खळबळ उडाली होती. पोलिसांनी तांत्रिक तपास, सीसीटीव्ही फुटेज आणि गुप्त माहितीच्या आधारे आरोपीचा शोध सुरू ठेवला. अखेर तीन दिवसांच्या शोधमोहीमेनंतर त्यांना ताब्यात घेण्यात आले.
तपासादरम्यान समोर आलेल्या माहितीनुसार, गायत्रीने काही काळापूर्वी कुटुंबाच्या इच्छेविरुद्ध जाऊन इतर जातीतील तरुणाशी प्रेमविवाह केला होता. या विवाहाला तिच्या वडिलांचा सुरुवातीपासूनच तीव्र विरोध होता. मुलीसाठी त्यांनी यापूर्वी दोन वेळा विवाहाची बोलणी आणि साखरपुड्याची तयारी केल्याचेही समोर आले आहे. मात्र गायत्रीने ते प्रस्ताव नाकारत स्वतःच्या पसंतीने आयुष्याचा जोडीदार निवडला होता.
पोलिसांच्या प्राथमिक चौकशीनुसार, गायत्री काही दिवसांसाठी माहेरी आली असताना घरात पुन्हा एकदा विवाहाच्या मुद्द्यावरून वाद झाला. दुपारच्या जेवणानंतर झालेल्या या वादाने अचानक गंभीर वळण घेतले. संतापाच्या भरात आरोपीने धारदार शस्त्राने मुलीवर हल्ला केल्याचा आरोप आहे. या हल्ल्यात गंभीर जखमी झालेल्या गायत्रीचा घटनास्थळीच मृत्यू झाला.
या प्रकरणात आरोपीने चौकशीदरम्यान गुन्ह्याची कबुली दिल्याची माहिती तपास यंत्रणांकडून मिळाली आहे. आंतरजातीय विवाहाबद्दलच्या नाराजीमुळेच हे टोकाचे पाऊल उचलल्याचेही चौकशीत समोर आल्याचे सांगितले जात आहे.
दरम्यान, आरोपीला न्यायालयात हजर करण्यात आले असून न्यायालयाने त्याला चार दिवसांची पोलीस कोठडी सुनावली आहे. या घटनेमागे आणखी काही कारणे आहेत का, तसेच गुन्ह्यात इतर कोणाचा सहभाग होता का, याचाही तपास सुरू असल्याची माहिती पोलिसांनी दिली.
स्वतःच्या मुलीच्या निवडीचा स्वीकार न झाल्याने एका कुटुंबाचा झालेला हा दुर्दैवी शेवट समाजात आंतरजातीय विवाह आणि कौटुंबिक स्वीकार या विषयांवर पुन्हा चर्चा निर्माण करत आहे.
