राष्ट्रवादीत ‘महाभूकंपा’ची चाहूल? 40 बडे नेते भाजपाच्या वाटेवर असल्याचा दावा; अतुल लोंढेंच्या वक्तव्याने राजकारण ढवळून निघालं
मुंबई : राष्ट्रवादी काँग्रेसच्या राजकारणात सध्या पडद्यामागे मोठ्या हालचाली सुरू असल्याची जोरदार चर्चा रंगली आहे. पक्षातील काही बडे नेते भाजपाच्या संपर्कात असल्याच्या चर्चांमुळे राजकीय वातावरण तापलं असून, याच मुद्द्यावरून काँग्रेसचे प्रवक्ते अतुल लोंढे यांनी केलेल्या वक्तव्याने नवा राजकीय वाद निर्माण झाला आहे.
आमदार रोहित पवार यांनी काही दिवसांपूर्वी राष्ट्रवादीतील अनेक आमदार भाजपात जाण्याच्या तयारीत असल्याचा दावा केला होता. त्यानंतर आता अतुल लोंढे यांनी “रोहित पवारांकडे भाजपात जाणाऱ्या सुमारे ४० नेत्यांची माहिती आहे,” असं म्हणत चर्चांना आणखी हवा दिली. त्यांच्या या विधानामुळे राष्ट्रवादीतील अंतर्गत अस्वस्थता पुन्हा एकदा उघडपणे समोर आली आहे.
गेल्या काही दिवसांपासून राष्ट्रवादीत सुरू असलेल्या घडामोडींमुळे पक्षात दोन गटांमध्ये मतभेद वाढत असल्याचं बोललं जात आहे. माजी सरचिटणीस आनंद परांजपे यांनी अचानक पक्षाला रामराम ठोकत शिंदे गटाच्या शिवसेनेत प्रवेश केल्यानंतर या चर्चांना अधिक बळ मिळालं. त्याचवेळी प्रफुल पटेल आणि सुनील तटकरे हे पक्षातील काही निर्णयांवर नाराज असल्याचंही बोललं जात आहे.
दरम्यान, पार्थ पवार यांनी मुख्यमंत्री देवेंद्र फडणवीस यांची घेतलेली भेटही चर्चेचा विषय ठरली. या भेटीनंतर राष्ट्रवादीतील काही नेते भाजपाच्या जवळ जात असल्याच्या चर्चा राजकीय वर्तुळात वेगाने पसरल्या.
या सर्व घडामोडींवर भाष्य करताना अतुल लोंढे यांनी राष्ट्रवादीच्या नेतृत्वावरच प्रश्न उपस्थित केला. “राष्ट्रवादी काँग्रेस नेमकी कोणाच्या नियंत्रणात आहे? शरद पवार, प्रफुल पटेल, सुनील तटकरे की भाजप?” असा सवाल त्यांनी उपस्थित केला.
तसेच भाजपवर निशाणा साधताना त्यांनी भाजपचे राष्ट्रीय अध्यक्ष जे. पी. नड्डा यांच्या जुन्या विधानाचा उल्लेख केला. “देशात विरोधी पक्ष उरणार नाही, असं भाजपकडून आधीच सांगितलं गेलं होतं. आता त्याच दिशेने हालचाली सुरू असल्याचं दिसत आहे,” असा आरोप त्यांनी केला.
राष्ट्रवादीत पुढील काळात मोठी फूट पडू शकते, अशी शक्यता व्यक्त करताना लोंढे म्हणाले की, “सत्तेच्या समीकरणांमुळे अनेक नेते वेगळा निर्णय घेण्याच्या तयारीत आहेत. त्यामुळे पक्षातील अंतर्गत संघर्ष दिवसेंदिवस वाढताना दिसतोय.”
यावेळी विधान परिषदेत उद्धव ठाकरे यांच्या उपस्थितीबाबत विचारलेल्या प्रश्नावरही लोंढेंनी प्रतिक्रिया दिली. “पंतप्रधान नरेंद्र मोदी संसदेत किती वेळा उपस्थित असतात, हेही पाहायला हवं. उद्धव ठाकरे यांची उपस्थिती त्यांच्यापेक्षा अधिक आहे,” असा टोला त्यांनी लगावला.
तसेच आमदार सदाभाऊ खोत यांच्यावर टीका करताना त्यांनी कठोर शब्दांत प्रतिक्रिया दिली. “इतरांवर बोलण्यापेक्षा सदाभाऊंनी आधी स्वतःकडे पाहावं,” असं म्हणत त्यांनी निशाणा साधला.
राज्यात आगामी निवडणुकांच्या पार्श्वभूमीवर सुरू झालेल्या या चर्चांमुळे राष्ट्रवादी काँग्रेसमध्ये पुढे नेमक्या कोणत्या राजकीय घडामोडी घडणार, याकडे आता संपूर्ण राज्याचं लक्ष लागलं आहे.
